Atyraýda aýdandyq ІІB basshysynyń ólimine qatysty taǵy bir qylmystyq is qozǵaldy
ATYRAÝ. QazAqparat - Atyraýda Isataı aýdandyq ІІB basshysy Altynbek Qubaıdollınniń óliminen keıin «Óz-ózin óltirýge deıin jetkizý» baby boıynsha qylmystyq is qozǵaldy.
«Qylmystyq is QR QK 102 baby boıynsha qozǵaldy. Munda adamdy óz-ózin óltirýge deıin jetkizgeni úshin jaza qarastyrylǵan», - dep habarlady aımaqtyq ІІD baspasóz qyzmetinen. Aıta keteıik, osyǵan deıin bul oqıǵaǵa qatysty zańsyz ustaǵany úshin jaza qarastyrylǵan QR QK 346 baby boıynsha qylmystyq is qozǵalǵan bolatyn. Eske sala keteıik, 21 sáýirde qarjy polıtsııasynyń qyzmetkerleri Altynbek Qubaıdollındi 250 myń teńge kóleminde para jáne 3 keli bekire ýyldyryǵyn alyp jatqan jerinde ustaǵan bolatyn. Quqyq salasyndaǵy laýazym ıesine qatysty brakonerlik áreketterge járdemdesti degen kúdik bolǵan. Tergeý kezinde ol densaýlyǵynyń nasharlaǵanyna shaǵymdanǵan. Shaqyrtylǵan medıtsına qyzmetkerleri onyń qan qysymynyń kóterilip ketkenin aıtqan soń ol aýrýhanaǵa jatqyzylady. Medıtsınalyq járdem kórsetilgennen keıin kúdikti aýrýhanadan qashyp ketip, izin sýytqan. Tek jeksenbi kúni onyń óli denesi qurylys nysandarynyń birinen tabyldy.
