Atyraýda aýdandyq aýrýhanaǵa kompıýterlik tomografııa berildi
ATYRAÝ. QazAqparat – Atyraý oblysyndaǵy Qurmanǵazy aýdandyq aýrýhanasyna kompıýterlik tomografııa berildi, dep habarlaıdy QazAqparat.
Kaspıı qubyr konsortsıýmynyń bas dırektory Nıkolaı Gorbannyń málimetinshe, kompıýterlik tomografııany satyp alý úshin 360 mln teńge jumsalǵan.
«Japondyq «Hitachi» kompanııasy shyǵarǵan medıtsınalyq apparat (SUPRIA modeli) adam denesin tolyq dıagnostıkalaýdy qamtamasyz etetin 128 bólimdi skanerden ótkizedi. Radıatsııalyq júktemeni azaıtý úshin «IntelliEC» dozasyn ıntellektýaldy qaıta bólý algorıtmi men «IntelliIP» ıteratsııasynyń zamanaýı ádisi qoldanylady. Bul vızýalızatsııa sapasyn joǵaltpaı, dozalardyń óte tómen mánderimen zertteý júrgizýge múmkindik beredi», - deıdi oblystyq densaýlyq saqtaý basqarmasynyń basshysy Ashan Baıdýálıev.
Onyń aıtýynsha, bul apparattyń koronavırýs ınfektsııasyna shaldyqqan patsıentter úshin qajetti. Qazir Atyraý oblysynda 12 kompıýterli tomografııa, 4 MRT, 41rentgen apparaty, 669 ottegi kontsentraty, 1 514 oksımetr, 267 ókpeni jasandy jeldetý apparaty men 8 ottegi stansasy bar.
Eske sala ketelik, Atyraýǵa «Spýtnık V» vaktsınasy II komponentiniń 7,6 myń dozasy jetkizildi.
