Atyraýda aýdandyq aýrýhana 80 kásipkerge 168 mln teńge qaryz bolyp qalǵan
Qurmanǵazy aýdanynyń prokýratýrasy aýdandyq aýrýhananyń memlekettik satyp alý salasyndaǵy jumysyna taldaý júrgizgen.
«Prokýrorlyq qadaǵalaýdyń basym baǵyttarynyń biri – kásipkerlik sýbektileriniń quqyqtary men zańdy múddelerin qorǵaý. Aýdandyq aýrýhana qyzmetine júrgizilgen taldaýdyń qorytyndysynda kásipkerlerdiń sharttar boıynsha óz mindettemelerin tolyq oryndaǵanyna qaramastan, tapsyrys berýshiniń shartta belgilengen tártippen jáne merzimde tólem júrgizbegeni anyqtaldy. Prokýrorlyq yqpal etý sharalary arqyly 80 kásipkerdiń aldynda jalpy somasy 168 mln 486 myń 177 teńge bereshek tolyǵymen óndirildi», -dep habarlady aýdandyq prokýratýradan.
Qazir aýdandyq prokýratýrada mobıldi top qurylǵan. Mobıldi top kez kelgen kásipkerdiń quqyqtary men zańdy múddesi buzylǵan jaǵdaıda ótinishterin qaraıdy.
Sondaı-aq, aýdanda turmystyq qatty qaldyqtardy jınaý qyzmetine kásipkerler úshin ortaq tarıf zańsyz bekitilgenin anyqtalǵan.
«Atap aıtqanda, Ekologııa kodeksiniń 367-babynda kásipkerler úshin turmystyq qatty qaldyqtardy jınaý jáne tasymaldaýǵa tarıf bekitý kózdelmegen. Taraptar arasynda jasalǵan kelisim shartqa sáıkes tólenedi. Alaıda, aýdandyq máslıhat sheshimimen kásipkerler úshin tarıf zańsyz bekitilip, aýdandaǵy 281 zańdy tulǵa men 2 405 jeke kásipkerdiń quqyqtary buzylǵan. Prokýrorlyq qadaǵalaý aktisi boıynsha máslıhat sheshimi zańǵa sáıkestendirilip, kásipkerlerdiń buzylǵan quqyǵy qorǵaldy», -deıdi aýdan prokýrory Magılan Rahımov.
Eske sala ketelik, buǵan deıin Atyraý oblysynda kedergige tap bolǵan kásipkerler Antıkorǵa shaǵymdanǵanyn jazǵan bolatynbyz.
