Atyraýda aýdan ákiminiń orynbasary para alǵany úshin 7 jylǵa sottaldy
ATYRAÝ. QazAqparat - Atyraý oblysynyń Maqat aýdandyq soty aýdan ákiminiń burynǵy orynbasaryn 7 jylǵa bas bostandyǵynan aıyrdy, al ákimdiktiń bólim basshysy 35 mln teńge aıyppul tóleıtin boldy, dep habarlaıdy QazAqparat tilshisi.
«Atyraý oblysy Maqat aýdandyq soty Maqat aýdany ákiminiń burynǵy orynbasaryna qatysty úkim shyǵardy. Laýazymdy tulǵalar merdiger uıym basshysynan 500 myń teńge kóleminde para alǵany úshin aıyptalǵan bolatyn. Eks-orynbasar Jaqsylyq Músepov QR QK 366-baby, 1,2-tarmaqtary boıynsha («Aldyn-ala sóz baılasý arqyly bir top adam bolyp, bopsalaý jolymen para alý») kináli dep tanyldy. Ol 7 jylǵa sottaldy, merzimin qaýipsizdik deńgeıi ortasha túzeý mekemesinde óteıdi», - dedi Atyraý oblystyq sotynan.
Sondaı-aq, aýdandyq qurylys bóliminiń burynǵy basshysy QR QK 366-baby boıynsha kináli dep tanyldy. Oǵan alǵan parasynyń 70 ese kóleminde, ıaǵnı 35 mln teńge aıyppul salyndy.
Eske salsaq, jyl basynda sybaılas jemqorlyqqa qarsy is-qımyl ulttyq bıýrosynyń Atyraý oblysy boıynsha departamentiniń qyzmetkerleri atalmysh sheneýnikterdi ustaǵan bolatyn.
