Atyraýda aýdan ákimdigi úı qurylysy bitpese de, merdigerge 330 mln teńgeni aýdaryp jibergen

ATYRAÝ. QazAqparat – Atyraý oblysynda turǵyn úı qurylysynan 330 mln teńgeni jymqyrý táýekeli anyqtalǵan, dep habarlaıdy QazAqparat.

Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń basshysy Erlan Dosanovtyń aıtýynsha, memlekettik organdar basshylarynyń tarapynan tıisti baqylaýdyń bolmaýy áleýmettik nysandar men jol qurylysyn merziminde tapsyrmaýǵa ákelip soqtyrady.

Al, sybaılas jemqorlyqqa qarsy mádenıetti qalyptastyrý úshin formaldy tásilder qoldanylady.

Máselen, Isataı aýdanyndaǵy sharýa qojalyqtarynyń jetekshilerin malǵa arnalǵan sýdyń jetispeýshiligi alańdatyp otyr.

Munda 1966 jyly paıdalanýǵa berilgen Naryn kanalyn kúrdeli jóndeý qajettigi ótkir tur.

Kanalǵa kúrdeli jóndeý júrgizý úshin memlekettik bıýdjetten qosymsha qarajat qajet. Bul – áleýmettik jáne jedel sheshýdi qajet etetin máseleniń biri.

«Bizdiń departamenttiń qyzmetkerleri Aqqystaý aýylynda 60 páterlik 3 qabatty turǵyn úı qurylysynan memlekettik bıýdjet qarajatyn urlaý qaýpin anyqtady. Isataı aýdany ákimdiginiń laýazymdy tulǵalary atqarylǵan qurylysy jumysy týraly jalǵan aktige qol qoıdy. Demek, tapsyrys berýshi tólem jasady. Al, 3 turǵyn úı qurylysyn júrgizý kezinde 330 mln teńgeden astam somanyń jumysy oryndalmady. Turǵyn úıler áli paıdalanýǵa berilmegendikten oblys basshylyǵynyń atyna hat joldandy. Nysandar paıdalanýǵa berilgenge deıin bizdiń departamenttiń baqylaýynda bolady», -dedi Erlan Dosanov.

Onyń aıtýyna qaraǵanda, óńirdegi problemalyq máseleler turǵyndardyń memlekettik apparatqa degen senimin tómendetip, sybaılas jemqorlyq táýekelin týdyrady.

Eske sala ketelik, buǵan deıin Atyraý oblysy sybaılas jemqorlyqtyń aldyn alý boıynsha sońǵy orynda turǵanyn jazǵan bolatynbyz.