Atyraýda aýdan ákimderiniń áleýmettik jelide belsendiligi artady
ATYRAÝ. QazAqparat -Atyraý oblysynyń Inder aýdanynda 192 otbasyǵa arnalǵan kóppáterli turǵyn úı boı kóterýde. Bul týraly aýdan ákimi Meıirim Qalaýı halyqpen esep berý kezdesýinde aıtty, dep habarlaıdy QazAqparat tilshisi.
Inder aýdany ákiminiń eseptik jıynyna Atyraý oblysynyń ákimi Nurlan Noǵaev qatysty.
Meıirim Qalaýıdiń aıtýynsha, aýdanda aýyl sharýashylyǵy óniminiń jalpy kólemi 8 mlrd 511 mln teńgeni quraıdy. Bul ótken jylmen salystyrǵanda 484 mln teńgege artyq. Aýdandaǵy 19 kásiporynnyń ónerkásip ónimi 2 mlrd 128 mln teńgege jetip otyr.
Aýdan boıynsha 343 200 ga jerdiń 246 436 gektary, ıaǵnı 71,8% tsıfrlandyrylyp, elektrondy kartaǵa engizilgen.
«Bul jumystar jalǵasyn tabady. Jer resýrstaryn paıdalanýdyń ashyqtyǵyn qamtamasyz etý úshin osyndaı sharalar kerek. Sonymen birge, oblys ákimi buǵan deıin de aıtqandaı, jaqynda aýyl sharýashylyǵyn sýbsıdııalaý elektrondy úlgige kóshiriledi», - dedi aýdan ákimi.
Ol sondaı-aq óz baıandamasynda qurylysy júrip jatqan jáne bolashaqta josparlanǵan nysandardy atap ótti.
Qazir aýdan ortalyǵynda 48 páterlik tórt turǵyn úıdiń qurylysy júrip jatyr. Ol 192 otbasyny baspanamen qamtıtyn bolady. 18 nysannyń jobalaý-smetalyq qujattamasy daıyndalyp, saraptamadan ótti. 19 nysannyń qujaty saraptamaǵa usynylǵan.
«Men Inder aýdany ákiminiń atqarǵan qyzmetine oń baǵa beremin. Biraq bul iste aýdan turǵyndarynyń belsendiligi de mańyzdy, bárińizge qoldaýlaryńyz úshin alǵys aıtamyn. Jurtshylyq pen memlekettik organdar arasyndaǵy ózara baılanysty nyǵaıtý maqsatynda aýdan basshylyǵyna, jaýapty organdarǵa aı saıyn ashyq esik kúnin ótkizý tapsyryldy. Shara aıasynda turǵyndar úshin barlyq ákimdikter men áleýmettik mekemelerdiń esikteri ashyq bolady. Basqarma basshylary, aýdan ákimderi jýrnalıster men telekórermen aldynda sóz sóıleıdi. Jaqynnan beri áleýmettik jeliler arqyly tikeleı baılanysqa shyǵyp, turǵyndardyń saýaldaryna jaýap beretin boldy. Biz bul jumysqa áli de nazar aýdaramyz. Barlyq deńgeıdegi ákimdikter halyqpen tyǵyz baılanysta bolýlary kerek», - dedi aımaq basshysy Nurlan Noǵaev.
