Atyraýda atyshýly kisi ólimine qatysty kúdikti eki adam tutqyndaldy
ATYRAÝ. QazAqparat - Atyraýda atyshýly kisi ólimine qatysty kúdikti eki adam tutqyndaldy, dep habarlaıdy QazAqparat tilshisi.
Atyraý qalalyq №2 sotynyń sýdıasy kisi óltirdi dep aıyptalǵan eki adamǵa qatysty 2 aı merzimge qamaýǵa alý túrinde shara qoldandy.
«Tergeý barysynda 2018 jylǵy 25 mamyrda kúdiktiler adam tasymaldaýmen aınalysyp, keıin olardy tonaýǵa kelisken. Sol kúni olar vokzal mańynan jolaýshyny alyp, ony kelisken baǵa boıynsha aıtqan mekenjaıyna aparý kerek bolatyn. Alaıda, qaskóıler «Jónegen» ataýly zıratqa qaraı bet alǵan. Jolaýshy jergilikti turǵyn bolmaǵandyqtan, qaıda bara jatqanyn bilmegen. Nátıjesinde kúdiktiler jolaýshyny zıratqa kirgizip, ony taspen soǵyp óltiredi. Jábirlenýshiniń ólgenine kóz jetkizgen soń ámııany men qol saǵatyn alyp qashyp ketedi»,- dep habarlady Atyraý qalasynyń №2 sotynyń baspasóz qyzmeti.
Kúdiktilerge qazir bir top adamdardyń paıdakúnemdikpen aldyn ala uıymdasyp kisi óltirýi, qaraqshylyq jáne bopsalaý áreketteri boıynsha aıyp taǵylýda.
