Atyraýda attraktsıonnyń átkenshegi úzilip, balalar jerge qulady

ATYRAÝ. QazAqparat – Atyraý qalasynda attraktsıonnyń átkenshegi úzilip, balalar jerge qulady. Atalǵan oqıǵaǵa baılanysty qylmystyq is qozǵaldy, dep habarlaıdy QazAqparat.

Oqıǵa keshe, 16 shildede jergilikti ýaqytpen saǵat 22:30 shamasynda bolǵan.

Bul derekti Atyraý oblystyq Polıtsııa departamentiniń baspasóz qyzmeti rastady.

Munaıly shahardyń turǵyndary keshki serýen kezinde balalaryn attraktsıonǵa otyrǵyzǵan.

Alaıda, átkenshek birden toqtap, oryndyqtar bekitilgen jeli úzilip ketken.

«Oqıǵa bolǵan jerge jedel járdem brıgadasy shaqyryldy. Aýyr jaraqat alǵandar joq», - dep habarlady oblystyq Polıtsııa departamentiniń baspasóz qyzmetinen.

Qazir atalǵan faktige qatysty QR Qylmystyq kodeksiniń 141-baby (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý) boıynsha tergeý júrgizilip jatyr.

Attraktsıon átkensheginiń úzilýinen zardap shekken balalar jedel járdem kóligimen oblystyq balalar aýrýhanasyna jetkizildi. Aýrýhana dárigerleriniń tekserýinen soń balalar úılerine jiberildi.

Atalǵan attraktsıon Jaıyq ózeniniń jaǵalaýyndaǵy Jastar saıabaǵynda ornalasqan. Sońǵy bir jyl boıy toqtap turǵan «Keremet jaǵalaý» attraktsıony bıyl iske qosylǵan.