Atyraýda attraktsıonnan qulaǵan tórt bala jeńil jaraqat alǵan
Budan buryn Atyraýda attraktsıonnyń átkenshegi úzilip, balalar jerge qulaǵanyn habarlaǵan edik.
Oblystyq polıtsııa departamentiniń baspasóz qyzmeti málimetinshe, atalǵan faktige qatysty QR Qylmystyq kodeksiniń 141-baby (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý) boıynsha tergeý júrgizilip jatyr.
Oblystyq densaýlyq saqtaý basqarmasynyń baspasóz qyzmetiniń málimetine súıensek, «Keremet jaǵalaý» attraktsıonyndaǵy átkenshektiń qulaýynan tórt bala zardap shekken.
«Attraktsıondaǵy átkenshek qulaǵan kezde jedel járdem brıgadasy shaqyryldy. Jedel járdem brıgadasy zardap shekken tórt balany oblystyq balalar aýrýhanasyna jetkizdi. Aýrýhana dárigerleri zardap shekken balalardy tolyq medıtsınalyq tekserýden ótkizip, olardyń jaraqaty jeńil ekenin anyqtady. Balalar úıine jiberildi. Endi olar turǵylyqty mekenjaıy boıynsha ýchaskelik dárigerlerdiń baqylaýynda bolady», -dep habarlady basqarmanyń baspasóz qyzmeti.
Al, «Keremet jaǵalaý» balalar oıyn alańynyń basqarýshysy Manas Serikqalıevtyń aıtýynsha, jeńil jaraqat alǵan balalardyń ata-analarynan shaǵym túspegen.
«Bizge jaraqat alǵan balalardyń ata-analary qolhatyn berdi. Olardyń tarapynan shaǵym túsken joq. Zardap shekken balalar úsh kúnge deıin bizdiń de baqylaýymyzda bolady. Attraktsıondaǵy átkenshek oryndyqtary bekitilgen jeliniń úzilýine baılanysty tekserý júrgiziledi. Onyń sebebi tekserý aıaqtalǵan soń qosymsha habarlanady. Qazir oıyn alańy jabyldy», -dep málim etti «Keremet jaǵalaý» balalar oıyn alańynyń basqarýshysy Manas Serikqalıev.