Atyraýda Astana kúni qarsańynda 195 otbasyna páter kiltteri tabystaldy

ATYRAÝ. QazAqparat - Atyraýda Astananyń 20 jyldyq mereıtoıy qarsańynda 195 otbasyna «Bereke» yqshamaýdanynda ornalasqan turǵyn úıdiń páter kiltteri tabystaldy. Baspana «Nurly jer» baǵdarlamasy aıasynda berilip otyr, dep habarlaıdy QazAqparat tilshisi óńirlik kommýnıkatsııalar qyzmetine silteme jasap. 

Barsha jınalǵan qaýymdy Atyraý qalasy ákiminiń orynbasary Polymbet Hasanov quttyqtap, jańa páterdiń kiltterin tapsyrdy. 

«Oblys basshysynyń tapsyrmasyna sáıkes, Atyraýda memleket basshysy bekitken baǵdarlamalar aıasynda turǵyn úı qurylysy qarqyndy júrip jatyr. Biz turǵyndardyń barlyǵyna qoljetimdi bolýy úshin qurylysty belsendi túrde júrgizýdemiz. Osyndaı jarqyn meıramda, el astanasynyń tól merekesinde 195 otbasy qonys toıyn toılady», - dedi Polymbet Hasanov.

Aıta ketý kerek, 2018 jyly oblysta 3892 páterlik 44 kópqabatty turǵyn úıdiń qurylysy bastaldy.  Bıyl 34 úı paıdalanýǵa beriledi. Oblys ortalyǵynda 39 úı salynsa, qalǵany aýdandarda. Sonymen qatar, bul - táýelsizdik jyldaryndaǵy aımaqtaǵy turǵyn úı qurylysy úshin rekordtyq kórsetkish.