Atyraýda Assambleıa jastary múgedekterge 2 tonna kókónis alyp berdi
«Jańǵyrý joly» jastar qozǵalysynyń jetekshisi, Atyraý qalalyq máslıhat depýtaty Tamıla Rozmetova aıtýynsha, mundaı qaıyrymdylyq sharasy aldaǵy ýaqytta da jalǵasyn tabady.
«Biz tek kókónis ónimderimen ǵana emes, sondaı-aq, muqtaj jandardy tabıǵı taza eshki sútimen, odan jasalatyn taǵam túrlerimen qamtamasyz etýdi qolǵa alamyz. Aptasyna bir ret osyndaı kómek kórsetemiz. Bizdiń eriktilerimiz ár muqtaj janǵa qajetti ónimderdi mekenjaıyna jetkizip beredi», - deıdi Tamıla Rozmetova.
Atyraý oblystyq soqyrlar qoǵamdyq birlestiginiń tóraǵasy, І top múgedegi Jumabaı Ábýǵalıev múmkindigi shekteýli jandarǵa mundaı qoldaýdyń qajettigin alǵa tartady.
«Byltyr zaǵıp jandardyń «Móldir kóz» qoǵamdyq birlestigin ashqan edim. «Móldir kózde» 127 múgedek tirkelgen. Onyń birinshi topqa jatatyn 67 múgedek bar. Sondaı-aq, 12 adam jeńil tamaq ónerkásibimen aınalysady. Qamqorlyq aıynda «Jańǵyrý jolynyń» jastary kómek berip otyr. Biz 59 myń teńge áleýmettik járdemaqy alamyz. Bul kóp nársege jete bermeıdi. Sondyqtan osyndaı qaıyrymdylyq kómektiń máni zor», - deıdi Jumabaı Ábiǵalıev.
