Atyraýda arnaıy balabaqshada erekshe balany qorlaý deregine baılanysty tergeý bastaldy
ATYRAÝ. QazAqparat – Atyraýda arnaıy balabaqshada erekshe balany qorlaý deregine baılanysty tergeý bastaldy, dep habarlaıdy QazAqparat tilshisi.
Oqıǵa Atyraý qalasyndaǵy «Jas urpaq» balabaqshasynda bolǵan. Bul týraly qoǵam belsendisi Lýgzana Baılaýova Facebook-tegi paraqshasynda jazba qaldyrdy.
«Búgin maǵan Ekaterına esimdi qyz telefon shalyp, «Jas urpaq» jeke balabaqshasynda 3 jasar ulyn qorlaýǵa baılanysty vıdeolardy jiberdi. Tıisti organdardan buǵan nazar aýdarýdy suraımyn. AVA-terapııa mamany Regınany barlyq sertıfıkatynan aıyrý qajet dep oılaımyn», -dep jazdy Lýgzana Baılaýova.
Vıdeoda balabaqsha qyzmetkeri uldy julqylap, qolynan urǵany baıqalady. Anasynyń jazýynsha, erekshe balamen ótkiziletin sabaq 45 mınýtqa sozylýy tıis.
«Alaıda, balabaqsha qyzmetkeri – AVA-terapııa mamany dáris ótkizýdi 5-10 mınýtpen shekteıdi. Únemi telefonmen otyrady. Ol telefonmen otyrýyna kedergi keltirgen balany urady», -dep jazǵan Ekaterına.
Atyraý oblystyq polıtsııa departamenti baspasóz qyzmetiniń aqparatyna qaraǵanda, atalǵan derekke baılanysty sotqa deıingi tergeý bastalǵan.
«Balabaqshadaǵy derekke qatysty QR Qylmystyq kodeksiniń 140-babynyń 2-bóligimen (Kámeletke tolmaǵan adamdy tárbıeleý jónindegi mindetterdi oryndamaý) sotqa deıingi tergeý amaldary júrgizilip jatyr. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy», -dep málim etti departamenttiń baspasóz qyzmetinen.
Eske sala ketelik, buǵan deıin Atyraýdaǵy ortalyqta aı saıyn 100 erekshe bala ońaltýdan ótetinin habarlaǵan bolatynbyz.
