Atyraýda Armenııadan ákelingen kólik jolda órtenip ketti

ATYRAÝ. QazAqparat – Atyraýda Armenııadan ákelingen kólik jolda órtenip ketti, dep habarlaıdy QazAqparat.

Oblystyq polıtsııa departamenti baspasóz qyzmetiniń aqparatyna qaraǵanda, oqys oqıǵa búgin, 30 qyrkúıekte saǵat 12:40 shamasynda bolǵan.

«Atyraý qalasyndaǵy «Juldyz» shaǵyn aýdanynda Armenııa Respýblıkasynan ákelingen «Toyota Camry» kóliginiń júrgizýshisi jolda kele jatyp, toqtyń ıisin sezgen. Jol jıegine toqtap, ıistiń neden shyqqanyn teksergen kezde kólik ózdiginen órtengen. Zardap shekkender joq. Qazir kóliktiń órtený sebebi tekserilip jatyr», - dep habarlady departamenttiń baspasóz qyzmeti.

Eske sala ketelik, buǵan deıin Atyraý oblysynda bir qabatty ǵımarattaǵy sýpermarket pen ashana órtengenin habarlaǵan edik.