Atyraýda aptap ystyqtan jedel járdem shaqyrýshylar kóbeıgen
ATYRAÝ. QazAqparat – Atyraýda aptap ystyqtan jedel járdemdi shaqyrtý kóbeıgen, dep habarlaıdy QazAqparat.
Oblystyq Densaýlyq saqtaý basqarmasy baspasóz qyzmetiniń málimetinshe, aptap ystyq bastalǵaly beri jedel járdemdi shaqyrtý ortasha eseppen 25-30% artqan.
«Buǵan deıin 103 qyzmetine táýligine ortasha eseppen 750-800 shaqyrtý kelip túsken. Al, qazir shaqyrtý sany 950-ge deıin ósti. Demalys kúnderi oblys turǵyndarynan túsken qońyraý sany 1100-ge jetti. Jedel járdemge arterııalyq gıpertonııasy, sondaı-aq, ınsýlttan keıingi asqynýy bar turǵyndar kóp shaǵymdanýda» -dep habarlady basqarmanyń baspasóz qyzmeti.
Sondaı-aq, jedel respıratorlyq aýrýdyń taralýy artqan. Dárigerler muny bólme temperatýrasynyń ózgerýimen, salqyn sýdy ishýmen baılanystyryp otyr.
