Atyraýda apatty jaǵdaıdaǵy «Tulpar» balalar lageriniń ǵımaraty buzylady
Atyraý qalasynyń mańyndaǵy Besikti aýylynda «Tulpar» lageri bar. Alǵashynda temirjolshylar úshin 1972 jyly demalys orny retinde ashylǵan.
Al, 1991 jyly oblystyq bilim basqarmasyna berilgen. Sodan beri munda jazǵy lager jumys istedi.
«Jazǵy lager ǵımaratyna 2017-2018 jyldary kúrdeli jóndeý júrgizý týraly másele oblystyq máslıhattyń sessııasyna engizilgen edi. Jaqynda biz atalǵan lager ǵımaratynyń jaı-kúıine zertteý júrgizdik. Sonyń qorytyndysymen ony buzyp, jańasyn salý kerek degen qorytyndyǵa keldik. Bul másele oblystyq máslıhattyń talqylaýyna engiziletin bolady. Jańa ǵımarat salýǵa qajetti qarjy respýblıkalyq bıýdjetten bólinetini josparlanyp otyr. Biz qurylys jumystaryn múmkindiginshe tezirek bastaýǵa nıettimiz», -dep habarlady oblystyq bilim basqarmasynyń basshysy Gúlnar Sadýahasova.
Jaıyq ózeniniń jaǵalaýynda ornalasqan «Tulpar» jazǵy lagerinde sporttyq alańdar, sýǵa júzý basseınderi, túrli úıirme jabdyqtary bolǵan. Munda 2019 jyly Arys qalasyndaǵy oq-dári qoımasyndaǵy jarylystan soń 88 bala demalǵan.
Eske sala ketelik, budan buryn Atyraýdaǵy 5 mektepti jóndeýden ótkizýge 1,7 mlrd teńge jumsalatynyn habarlaǵan bolatynbyz.
«Kúrdeli jóndeý jumystary júrgiziletin mekteptiń bári Atyraý qalasynda ornalasqan. Bular – №19 Q.Sátpaev atyndaǵy, №13 D.Baıbosynov atyndaǵy jáne №27, 31, 27-mektepter. Bes mekteptiń kúrdeli jóndeý jumystaryna 1 mlrd 740 mln teńge bólindi», -dep málim etti Gúlnar Sadýahasova.
