Atyraýda apat joıylyp, barlyq úıge jylý berildi

ATYRAÝ. QazAqparat – Atyraýdaǵy shaǵyn aýdanda magıstraldy qubyrdaǵy aqaý jóndelip, kópqabatty 87 úı men mektepke jylý berildi. Mekteptegi sabaq ádettegi formatta ótip jatyr, dep habarlaıdy QazAqparat tilshisi.

Budan buryn Atyraý qalasynyń «Nursaıa» shaǵyn aýdanyndaǵy qubyrdan aqaý tabylyp, jylý berý ýaqytsha toqtatylǵanyn habarlaǵan edik.

Sol sebepten, shaǵyn aýdanda ornalasqan kópqabatty 87 úıdiń turǵyndary tún ortasyna deıin jylýsyz otyrdy.

Atyraý qalalyq turǵyn úı-kommýnaldyq sharýashylyq bóliminiń sektor meńgerýshisi Temirlan Áýbákirovtiń deregine súıensek, keshe, 26 jeltoqsan kúni saǵat 11:30-da «Nursaıa» shaǵyn aýdanynda jylý berý júıesi isten shyqqan.

Magıstraldy jylý qubyrynyń jalpy uzyndyǵy 3045 metrdi quraıdy. Al, dıametri – 426 mm. Bul qubyr men kópqabatty 87 úı men №40 orta mektepke jylý berilip kelgen.

«Sonyń saldarynan 87 kóp qabatty turǵyn úı men №40 orta mektep jylýsyz qalǵan edi. Keshe, 26 jeltoqsanda jergilikti ýaqytpen saǵat 23:50-de úıler men bilim nysanyna jylý berý tolyqtaı qalpyna keltirildi», -dedi Temirlan Áýbákirov.

Al, jalpy bilim beretin №40 orta mekteptiń dırektory Janargúl Atshybaevanyń aıtýynsha, búgin, 27 jeltoqsanda bilim ordasynda sabaq toqtatylmaǵan. Oqýshylar mektepke kelip, sabaq ádettegi formatta ótip jatyr. Oqýshylar oqýlaryn oflaın formatta jalǵastyryp jatqanyn aıtty.

«AtyraýJylýJúıeleri» AQ-nyń birinishi vıtse-prezıdenti-bas ınjener Álibek Temirǵalıevtiń aıtýynsha, magıstraldy qubyrdaǵy aqaýdy jóndeý úshin dánekkerleý jumysy atqarylǵan. Keıin jylý qubyryn ystyq sýmen toltyrý protsesi júrgizilgen. Bul jumystardy atqarýǵa atalǵan kásiporynnyń 15-ke jýyq qyzmetkeri men 5 tehnıkasy tartylǵan.