Atyraýda apat qaýpi joǵary joldarǵa 400 metr jasandy kedergi ornatyldy
Atyraý qalalyq ákimdigi baspasóz qyzmetiniń málimetinshe, bıyl shaharda jáne oǵan irgeles ornalasqan aýyldardaǵy apat qaýpi joǵary joldarǵa 400 metr jasandy kedergi ornatylǵan.
Bul áleýmettik nysandar men balalar oıyn alańdarynyń mańyndaǵy kólik jyldamdyǵyn shekteý arqyly qaıǵyly oqıǵalardyń aldyn alý úshin jasalǵan.
«Jol ınfraqurylymyna qatysty jumystar turǵyndardyń ótinishine sáıkes júrgiziledi.. Máselen, Damby selosynyń turǵyndary R. Myrzaǵalıev kóshesi men F.Ońǵarsynova mektebiniń aldyna jasandy jol kedergisin ornatýdy surap, qala ákimi Qaırat Orazbaevtyń atyna ótinish jazdy. Turǵyndar ótinishi sheshimin tapty. Bıyl qalada jańartylǵan 35 myń sharshy metr joltańbanyń 13 myńy termoplastıkten daıyndaldy» deıdi Atyraý qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bas mamany Muqtar Saǵyndyqov.
Onyń aıtýynsha, mundaı kedergiler «Bereke» jáne «Juldyz» shaǵynaýdandarynda turǵyndardyń suraýymen salynǵan.
Bıyl Atyraý qalasynda 300 jol belgisin ornatý josparlanǵan. Onyń 53-i «Atyraý-Erkinqala» jolynda ornatylǵan.
Ózgeleri jol belgileri eskertý maqsatynda «Sergek» keshendi júıesi ornalasqan jerge qoıylǵan.
