Atyraýda Antıkordyń usynysymen 46 laýazymdy tulǵa jaýapqa tartyldy
Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Nurlan Jahınnyń aıtýynsha, jyl basynan beri tártiptik jaýapqa 46 adam tartylǵan. Onyń 3-i jumystan shyǵarylǵan.
«Bizdiń departament qylmystyq isterdi tergep-tekserý nátıjelerimen tıisti usynystar engizedi. Bıylǵy 9 aıda 42 usynys engizildi. Onyń kópshiligi ákimdikterge, qurylymdyq bólimshelerine (19), ishki ister organdaryna (17) jáne basqa da memlekettik qurylymdarǵa (6) jiberildi. Basshylardan qaramaǵyndaǵylardyń zańsyz áreketteri úshin jaýapkershilik suralatynyn eskerý qajet. Máselen, Atyraý qalalyq polıtsııa basqarmasynyń basshylary qaramaǵyndaǵylardyń qyzmetine baqylaý júrgizbegenine baılanysty tártiptik jaýapkershilikke tartyldy. Jergilikti polıtsııa qyzmeti bastyǵynyń mindetin atqarýshy atqaratyn laýazymyna tolyq sáıkes emestigi týraly eskertildi. Al, ıývenaldy polıtsııa bólimshesi bastyǵynyń mindetin atqarýshy aǵa ınspektor laýazymyn ýchaskelik ınspektorǵa deıin tómendetti», - deıdi Nurlan Jahın.
Onyń aıtýynsha, Atyraý qalalyq polıtsııa basqarmasy ıývenaldy polıtsııa bólimshesiniń ınspektory para bopsalaý deregimen 3 mln teńge aıyppul jazasyna sottalǵan.
Eske sala ketelik, budan buryn Atyraýda birneshe ret para alǵan departament basshysy sottalǵanyn habarlaǵan bolatynbyz.
