Atyraýda anasy dalada qaldyryp, joǵaltyp alǵan balalaryn polıtsııa izdep tapty
ASTANA. QazAqparat - Atyraýda polıtsııa qyzmetkerleri anasy dalada qaldyryp ketip joǵaltyp alǵan eki kishkene balany izdep tapty, dep habarlaıdy QazAqparat Atyraý oblystyq polıtsııa departamentiniń baspasóz qyzmetine silteme jasap.
«13 qańtarda keshki saǵat 20.03 shamasynda Atyraý munaı óńdeý zaýytynyń kúzetshisi 102 operatoryna qońyraý shalyp, zaýyt aýmaǵynda kámeletke tolmaǵan 2 balanyń joǵalyp ketkendigi týraly habarlaǵan.
Polıtsııa departamentiniń jeke quramy dereý balalardy izdeýge jumyldyryldy», - delingen habarlamada.
Keıin belgili bolǵandaı saǵat 19.00-der shamasynda 3 balasyn ertken anasy zaýyt tusynda taksıden túsip, Tasqala aýylyndaǵy úıine jetý úshin dalamen tike ketken.
Alaıda, kishkene balalar júre almaǵan soń 8 jasar ulyn ertip, 9-daǵy qyzy men 4-tegi ulyn batpaqty jerge tastap ketken. Qaıtyp oralǵanda ol qaldyryp ketken balalaryn tappaı polıtsııa kómegine júgingen.
«Saǵat 23.20-da polıtseıler balalardyń sharshap, jyńǵyl túbinde uıyqtap jatqan kúıinde tapty. Olar dereý №1 qalalyq polıtsııa bólimine jetkizilip, alǵashqy kómek kórsetildi. Qatty tońyp, qorqyp qalǵan balalarǵa jedel járdem shaqyrtylyp, aýrýhanaǵa jetkizildi», - delingen habarlamada.
Polıtsııanyń anyqtaýynsha, 38-degi kelinshek buǵan deıin analyq mindetin oryndamaǵany úshin ákimshilik jaýapkershilikke tartylyp, byltyr qarasha aıynan bastap jaısyz otbasylar tizimine alynǵan.
Aıta ketý kerek, narkologııalyq saraptama qorytyndysyna sáıkes azamatshanyń jeńil dárejedegi mastyǵy anyqtaldy.
Baspasóz qyzmetiniń habarlaýynsha, qazirgi ýaqytta áıeldiń áreketi Kámelet jasqa tolmaǵandar isi jónindegi komıssııanyń otyrysynda qarastyrylady.
