Atyraýda alqabıler 21 adamǵa qatysty qylmystyq iske sheshim shyǵardy
Atyraý oblysynyń qylmystyq ister jónindegi mamandandyrylǵan aýdanaralyq sotynda alqabılerdiń qatysýymen 21 adamǵa qatysty qylmystyq is qaraldy. Buǵan sottalýshylardyń biriniń ótinishi negiz bolǵan.
Kúdiktilerge QR Qylmystyq kodeksiniń 99-babynyń 2-bóliginiń 7,9-tarmaqtary, 24-babynyń 3-bóligi - 99-babynyń 2-bóliginiń 1,7,9-tarmaqtary, 107-babynyń 2-bóliginiń 4,5-tarmaqtary, 434 jáne 432-babymen aıyp taǵylǵan.
«2021 jylǵy 30 qazanda saǵat 19.00 shamasynda Atyraý oblysy Qyzylqoǵa aýdany Saǵyz aýylynda jábirlenýshiler men sottalýshylardyń arasynda tóbeles bastalyp, arty atysqa ulasqan. Jábirlenýshi K. oq jaraqaty saldarynan qaza bolǵan. Al, jábirlenýshiler E., A., I., K., B., T. ártúrli dárejedegi oq jaraqatyn alǵan. Sottalýshylardyń kinási jábirlenýshilerdiń, kýálardyń aıǵaqtarymen, saraptamalar qorytyndylarymen, oqıǵa bolǵan jerdi qaraý hattamasymen jáne zattaı dáleldemelermen tolyqtaı dáleldendi», -dep habarlady sottyń baspasóz qyzmeti.
Prokýror sottalýshylarǵa 2 jyl 6 aıdan 18 jylǵa deıingi bas bostandyǵynan aıyrý jazasyn taǵaıyndaýdy usynǵan. Al, jábirlenýshi tarap sottalýshylarǵa eń aýyr jazany taǵaıyndaýdy suraǵan.
Sottyń alqabıler quramy qabyldaǵan sheshimimen sottalýshy B. QR Qylmystyq kodeksiniń 99-babynyń 2-bóliginiń 7,9-tarmaqtarymen, 24-babynyń 3-bóligi-99-babynyń 2-bóliginiń 1,7,9-tarmaqtarymen kináli dep tanylyp, oǵan 16 jyl, Ý. 24-babynyń 3-bóligi-99-babynyń 2-bóliginiń 1,7,9-tarmaqtarymen kináli dep tanylyp, 11 jyl 3 aı merzimge bas bostandyǵynan aıyrý jazasy taǵaıyndaldy. Sottalýshy T. 293-babynyń 3-bóliginiń 2-tarmaǵymen kináli dep tanylyp, 5 jyl merzimge bas bostandyǵynan aıyrý jazasyna sottaldy. Sottalýshylar B., B., Ó., Q.-ǵa QR «Raqymshylyq týraly» Zańyna sáıkes, túpkilikti 2 jyl 8 aı merzimge bas bostandyǵynan aıyrý jazasy taǵaıyndaldy», -dep habarlady sottyń baspasóz qyzmeti.
Sondaı-aq, sottalýshy S. Qylmystyq kodekstiń 107-babynyń 2-bóliginiń 4,5-tarmaqtarymen kináli dep tanylyp, QR «Raqymshylyq týraly» Zańyna sáıkes jaýaptylyqtan bosatyldy. Sottalýshylar T. jáne Á.-ge QR «Raqymshylyq týraly» Zańyna sáıkes, túpkilikti 2 jyl 8 aı merzimge bas bostandyǵynan shekteý jazasy taǵaıyndaldy. Al, J., S., M., K., B., D., M., K., A., K., Ý. Qylmystyq kodekstiń 434-babynda kózdelgen qylmystyq quqyq buzýshylyqty jasaǵandary dáleldenbeýine baılanysty aqtaldy.
Sot úkimi zańdy kúshine engen joq.
Eske sala ketelik, budan buryn Atyraý oblysynda aýyl jastarynyń arasynda atys bolǵanyn, keıin jaraqat alǵan bir adam aýrýhanada kóz jumǵanyn jazǵan edik.