Atyraýda alǵashqy medıtsınalyq kómek kórsetetin 9 nysan salynady
ATYRAÝ. QazAqparat – Atyraý oblysynda alǵashqy medıtsınalyq kómek kórsetetin 9 nysan salynady, dep habarlaıdy QazAqparat.
Oblystyq densaýlyq saqtaý basqarmasynyń basshysy Ashan Baıýálıevtiń málimetinshe, 2025 jylǵa deıin birneshe medıtsınalyq nysan qurylysyn salý kózdelip otyr.
«Atyraý qalasyndaǵy «Órken», «Nursaıa» shaǵyn aýdandarynda 250 kelýshige arnalǵan emhana men aýyldyq eldi mekenderde 9 medıtsınalyq-sanıtarııalyq alǵashqy kómek kórsetetin nysan salý josparlanýda. Budan bólek, Atyraý qalasynda 3 qosalqy stansasymen birge jedel medıtsınalyq járdem stansasynyń qurylysy boı kóteredi. Bul jobalar Atyraý oblysyn áleýmettik-ekonomıkalyq damytýdyń 2021-2025 jyldarǵa arnalǵan josparyna saı júzege asady», - dedi Ashan Baıdýálıev.
Sondaı-aq, Atyraý qalasynda 250 kelýshige arnalǵan psıhıkalyq densaýlyq ortalyǵy, 350 kelýshige arnalǵan kópfýnktsııaldy aýrýhana, oblystyq onkologııa dıspanseri janynan radıologııalyq korpýstyń qurylysy josparlanǵan.
«Bul nysandardy iske qosý arqyly qan aınalymy júıesi, onkologııalyq, tynys alý joldary aýrýlarynan bolatyn, sondaı-aq, náreste men ana ólimin tómendetýge, onkologııalyq aýrýlardy erte anyqtaýǵa múmkindik alamyz», - dedi Ashan Baıdýálıev.
Oblys ákimi Mahambet Dosmuhambetov ana men bala óliminiń deńgeıin tómendetýdi, salaǵa qatysty memlekettik jáne aýmaqtyq baǵdarlamalarmen bekitilgen kórsetkishterge qol jetkizý baǵytyndaǵy jumystardy qolǵa alýdy tapsyrdy.
Eske sala ketelik, buǵan deıin Atyraý oblysynda 10 medıtsınalyq nysan paıdalanýǵa berilgenin jazǵan edik.
