Atyraýda alǵash ret Street Workout-tan týrnır bastaldy
ATYRAÝ. QazAqparat - Atyraýda alǵash ret Street Workout-tan qalalyq týrnır bastaldy. Týrnırdiń alǵashqy irikteý kezeńine 30-ǵa jýyq sportshy qatysty, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Saıys úsh kezeń boıynsha ótti: beltemirge (týrnık) qosymsha salmaqty beline baılap alyp tartylý, beltemirden keýdeni asyra tartylý jáne syryqtaǵy jattyǵý (brýsıa).
«Alǵashqy kezeńde jarysty qyzyǵyp kórýshiler sany kóp boldy. Bunyń ózi Street Workout-tyń jastar arasynda suranysqa ıe ári qoljetimdi sport ekeniniń dáleli. Osy sport túrin damytý maqsatynda qalamyzda 4 Street Workout alańy ashylǵan bolatyn. Bolashaqta halyq suranysy kóbeıip jatsa, atalǵan sport alańdaryn kóbeıtemiz», - deıdi qalalyq sport bóliminiń basshysy Rınat Ibragımov.
Saıystyń eń jas qatysýshysy - 12 jasar Arman Ybyraı. Ol barlyq jattyǵý boıynsha 31 upaı jınap, eresektermen birdeı dárejede synǵa tústi. Uıymdastyrýshylar Armandy "Jeńiske degen jigeri úshin" arnaıy dıplommen marapattady. Ózge de jarys jeńimpazdaryna arnaıy dıplom, medaldar men baǵaly syılyqtar tabys etildi.
Aıta ketý kerek, qalalyq týrnırge irikteýdiń kezekti 2-kezeńi 7 mamyr kúni Prıvokzalnyı 5-móltek aýdanynda ótedi. Úzdik shyqqan 5 qatysýshy 1 maýsym kúni ótetin aqtyq saıysqa joldama alady.
Abaı AQMURZIEV
