Atyraýda alǵash ret sporttyq oıyn kógershinderiniń kórmesi ótti
ATYRAÝ. Búgin Atyraýda Ulystyń uly kúni merekesine oraı sporttyq oıyn kógershinderiniń kórmesi respýblıkalyq deńgeıde uıymdastyryldy, dep habarlaıdy QazAqparat tilshisi.
Kórmege Reseı men Ózbekstan elderinen jáne Aqtóbe, Oral, Taraz, Shalqar, Qyzylorda, Atyraý qalalarynan 60-tan astam kógershin qatysty.
«Kógershin beıbitshilik qusy. Ol halqymyz úshin asa qadirli qustardyń biri. Búgingi kórmeni tamashalaýǵa kelgen kórermenderdiń qarasy sonyń dáleli. Atyraýda kógershin baptap, osy bir ásem qustyń túrin kútetin azamattar jeterlik. Maqsatymyz osy azamattardyń basyn qosyp, qus baptaýda ózara tájirıbe almasý, - deıdi kórmeni uıymdastyrýshy, Atyraý oblysy jaýyngerlik óner qaýymdastyǵynyń prezıdenti Erlan Tabyldıev.
Álem boıynsha sporttyq oıyn kógershinderiniń kórmesi dástúrli túrde ótkizilip turady. Atyraý oblysynda bul alǵashqy kórme.
Barlyq qatysýshylar saıystyń 8 túri boıynsha synǵa tústi. Naqtyraq aıtqanda ózbek kógershini, soltústik Kavkaz kógershinderiniń úsh túri, Túrik, Iran kógershinderi jáne sporttyq kógershinder boıynsha úzdikter anyqtaldy. Jeńimpazdar men júldegerlerge arnaıy kýbokter men dıplomdar tabys etildi. Qazylar alqasy Reseı men Ózbekstannan arnaıy shaqyrylǵan bolatyn.
Aıta ketý kerek, sharanyń ashylý saltanatynda oblystaǵy kógershin sportyn damytyp kele jatqan bir top ardagerlerge qurmet kórsetilip, estelik syılyqtar tabys etildi.
Shet elden kelgen qonaqtarǵa dástúr boıynsha shapan jabyldy.
