Atyraýda alǵash ret mammologııa ortalyǵy ashyldy
Búgin Atyraý oblysynyń ákimi Mahambet Dosmuhambetov pen Qazaqstan Respýblıkasynyń bas onkology Dılıara Qaıdarovanyń qatysýymen alǵashqy mammologııalyq ortalyq ashyldy.
Medıtsına mekemesin tehnıkalyq jabdyqtaý tolyǵymen «Olimp Medical Group»JShS-nyń óz qarajaty esebinen júzege asyryldy.
Atyraý qalasyndaǵy mammologııalyq ortalyq naýqastarǵa tegin qyzmet kórsetedi.
- El Táýelsizdiginiń 30 jyldyǵy, Elorda kúni qarsańynda Atyraýda alǵashqy mammologııalyq ortalyq ashyldy. Zamanaýı jabdyqtardyń kómegimen munda jylyna 8 myńǵa deıin zertteý júrgizýge bolady. Bul onkologııalyq aýrýlardy dıagnostıkalaý, aldyn alý sondaı-aq ony der kezinde anyqtap, shuǵyl emdeýge múmkindik beredi. Azamattarymyzdyń densaýlyǵy árqashan basty nazarymyzda. Aldaǵy jyldary oblysty keshendi damytý jospary aıasynda densaýlyq saqtaý salasyn qoldaý artyp, asa qajetti kóptegen medıtsınalyq ortalyqtar salynady, - dedi Atyraý oblysynyń ákimi Mahambet Dosmuhambetov.
Qazaqstannyń bas onkology Dılıara Qaıdarovanyń aıtýynsha, mundaı mamologııalyq ortalyqtardy ashý áıelder arasynda skrınıng júrgizý sapasyn jaqsartýǵa múmkindik beredi.
Atyraý oblysynda bul qyzmetter memlekettik-jekemenshik áriptestik aıasynda kórsetiledi. Endi óńirdiń árbir turǵyny tegin mammografııadan óte alady.
- Elimizde osyndaı 23 mammologııalyq ortalyq ashyldy. Atyraýda ashylǵan «Divera» ortalyǵynda gormondyq jáne molekýlıarlyq-gınetıkalyq zertteýler júrgizýge bolatyn klınıkalyq-dıagnostıkalyq zerthana bar. Tomosıntezdiń protsedýrasy ólshemi 1 mm deıingi qaterli isikti anyqtaýǵa múmkindik beredi. Barlyq sýretter onkologııa ınstıtýtyna qaıta oqý jáne nátıjeler sapasyn baqylaý úshin jiberiledi, - dedi Dılıara Qaıdarova.
Oblystyq densaýlyq saqtaý basqarmasynyń basshysy Ashan Baıdývalıevtiń sózinshe, búginde Atyraý oblysy onkologııamen aýrý kórsetkishi boıynsha 13-shi orynda tur.
«Jyl saıyn óńirde 700-den astam jańa onkologııalyq naýqastar anyqtalýda. Qazir 4 myńǵa jýyq patsıent oblystyq onkologııalyq dıspanserde esepte tur. Sonymen qatar, sút bezi qaterli isigi aımaqta ekinshi orynda. Birinshi stadııadaǵy sút bezi qaterli isigi bar naýqastardy anyqtaý óte tómen . Endi jańa ortalyqtyń arqasynda aýrýdy erte kezeńde anyqtaı alamyz, - dedi Ashan Baıdývalıev.
Aıta ketý kerek, jańa mammologııa ortalyǵynyń jumysy medıtsınalyq qyzmetterdiń qoljetimdiligin, onkologııalyq aýrýlardy anyqtaýdyń tıimdiligin arttyrýǵa baǵyttalady.
Bul óz kezeginde Atyraý oblysyndaǵy áıelderdiń ómir súrý uzaqtyǵyna oń áser etedi.
