Atyraýda alǵash ret qýyrshaq teatry ashylady

ATYRAÝ. QazAqparat – Atyraýda alǵash ret qýyrshaq teatry ashylady, dep habarlaıdy QazAqparat.

Mahambet atyndaǵy akademııalyq qazaq drama teatrynyń dırektory Berik Jámenovtiń aıtýynsha, 26 naýryzda balalardy qýantatyn jańa óner ujymynyń tanystyrylymy ótedi.

Qýyrshaq teatrynyń ashylýyna oraı atyraýlyq ártister Beket Zınýllınniń stsenarııi boıynsha «Ata mektebi» ertegisin daıyndap jatyr.

«Elimizde balalar dramatýrgııasy kenjelep qalǵan. Osy olqylyqtyń ornyn toltyrý úshin ózimiz stsenarıı jazýymyzǵa týra keledi. Bul joly balalarǵa arnap ertek jazatyn talanty akter Beket Zınýllınniń shyǵarmashylyǵyna jol ashylǵaly otyr» -deıdi teatr dırektory Berik Jámenov.

Eske sala ketelik, budan buryn Atyraýda teatr tarlandaryna qoıylǵan kompozıtsııa ashylǵan bolatyn.