Atyraýda alǵash ret alıment tólemegen adam qylmystyq jaýapqa tartylyp, sottalýy múmkin

ATYRAÝ. QazAqparat – Atyraýda 3,5 mln teńgeniń alımentin tólemegen er adamnyń isi sotqa berildi. Onyń turaqty jumysy bolǵan, dep habarlaıdy QazAqparat.

Atyraý qalalyq prokýratýrasynyń bólim prokýrory Áıgerim Sábıtqyzynyń málimetinshe, er adamnyń 6 jyldan beri tólemegen alımenti 3,5 mln teńgege jetken.

«Joǵarǵy sottyń tıisti normatıvtik qaýlysyna engizilgen ózgeristerge sáıkes, endi alıment tólemeı júrgen azamattar QR Qylmystyq kodekstiń 139-babymen 2 jylǵa deıin bas bostandyǵynan aıyrylady. Atyraý qalasynda alıment tóleýden jaltaryp, 3,5 mln teńge qaryzy bolǵan azamattyń isi sotqa joldandy», -deıdi Áıgerim Sábıtqyzy.

Onyń aıtýynsha, boryshkerdiń turaqty jumysy bar. Biraq, 6 jyl boıy alımentke bereshegin tólemeı kelgen.

«Endi istiń aq-qarasy sotta anyqtalady. Mundaı jaǵdaı Atyraý qalasynda alǵash ret tirkelip otyr. Sebebi buǵan deıin alımentke bereshegin tóleýden bas tartyp, jasyrynyp júrgen adamdar ákimshilik jazamen ǵana qutylyp kelgen», -dep málim etti Áıgerim Sábıtqyzy.

Qazir Atyraý qalasynda alıment tóleýden jaltaryp júrgen 153 er adam bar. Olardyń alıment boıynsha tólenbegen qaryzy 195 mln teńgeni quraıdy.

Eske sala ketelik, buǵan deıin Atyraý oblysynda 185 boryshker 290 mln teńgeniń alımentin tólemeı júrgenin jazǵan bolatynbyz.