Atyraýda áleýmettik mańyzy bar azyq-túlik 60% ústememen satylǵan

ATYRAÝ. QazAqparat – Atyraýda áleýmettik mańyzy bar azyq-túlik 60 paıyz ústeme baǵamen satylǵan, dep habarlaıdy QazAqparat.

Oblystyq Kásipkerlik jáne týrızm basqarmasynyń basshysy Nurbol Jańabekovtiń málimetinshe, bıyl tıimsiz deldaldardy anyqtaý jónindegi komıssııanyń 30-ǵa jýyq otyrysy ótkizilgen.

«Komıssııa otyrysynyń nátıjesinde «AtyraýProbSnab» JShS jetkizgen sary maı ónimi «Ideal Market» JShS-niń 40 saýda jelisinde 2690 teńgeden satylǵany anyqtaldy. Qazir atalǵan ónimniń baǵasy 1680 teńgege tómendetildi. Sýpermarket jelilerinde basqa oblystardan tasymaldanǵan tuz 75 teńgeden satylyp jatqany belgili boldy. Jergilikti taýar óndirýshi «Inder tuz» JShS-niń ónimin 45-55 teńgeden satýǵa usynys berildi. Sonyń nátıjesinde 58 sýpermarkette tuz baǵasy orta eseppen 34 paıyzǵa tómendetildi. Al «Treıd Standart» JShS, «Nýrsagıtov» jáne «ADK-Batys» jeke kásipkerligi sút, sary maı jáne taýyq etine 30-60 paıyz aralyǵynda ústeme baǵa qosyp, sýpermarket jelilerine tasymaldap kelgen. Komıssııa tarapynan ústeme baǵany 15 paıyzǵa deıin tómendetý baǵytynda tıisti jumystar júrgizildi», - dep habarlady Nurbol Jańabekov.

Onyń aıtýynsha, QR Ákimshilik quqyq buzýshylyq týraly kodeksiniń 204-babyna sáıkes, taýarlarǵa ústeme baǵa 15 paıyzdan asyrylmaýy kerek. Eger bul deńgeıden asatyn bolsa, shaǵyn kásipkerlik sýbektilerine 10 AEK (34 500 teńge), orta kásipkerlik sýbektilerine 75 AEK (258 750 teńge), iri kásipkerlik sýbektilerine 300 AEK (1 mln 35 myń teńge) kóleminde aıyppul salynady.

Eske sala ketelik, budan buryn Atyraýda azyq-túlik baǵasynyń ósýine deldaldar sebep bolǵanyn habarlaǵan edik.