Atyraýda aldaǵy 5 jylda 10 iri ınvestıtsııalyq joba iske asyrylady
Bul týraly oblystyq máslıhattaǵy «Nur Otan» partııasy depýtattyq fraktsııasynyń otyrysynda belgili boldy..
«Tuńǵysh Prezıdent, partııa Tóraǵasy Nursultan Nazarbaev «Nur Otan» partııasynyń 2025 jylǵa deıingi «Ózgerister joly: ár azamatqa laıyqty ómir!» saılaýaldy baǵdarlamasyn oryndaý jónindegi «Jol kartasyn» ázirlep, jarııa túrde qaraýdy tapsyrǵan edi. Sondyqtan, bıýdjet qarajatynyń tıimdi, ashyq jumsalýyna monıtorıng jasaýdy qamtamasyz etý, partııanyń saılaýaldy baǵdarlamalary men «Jol kartalaryn» iske asyrý qatań baqylaýda bolýy kerek» -dedi partııa fılıalynyń tóraǵasy, oblys ákimi Mahambet Dosmuhambetov.
Al, fılıal tóraǵasynyń birinshi orynbasary Meıirim Qalaýı «Jol kartasynyń» bıylǵy 6 aıda oryndalýy týraly baıandady.
«Aımaq turǵyndarynyń tabysyn arttyrý úshin aldaǵy 5 jylda 10 iri ınvestıtsııalyq jobany iske asyrý josparlanyp otyr. Onyń ishinde ónerkásipti órkendetetin 4, aýyl sharýashylyǵyn alǵa súıreıtin 2 joba bar. Sondaı-aq, turǵyn úı-kommýnaldyq sharýashylyq salasynda 3,5 mln sharshy metr turǵyn úıdi paıdalanýǵa berip, 7 myń otbasyn baspanamen qamtamasyz etý kózdelgen,- dedi Meıirim Qalaýı.
Onyń aıtýynsha, 10 medıtsınalyq nysan, 11 mektep pen 56 balabaqsha, 22 sport kesheni salynady. «Bıznestiń jol kartasy – 2025» baǵdarlamasy aıasynda keminde 1000 jobany sýbsıdııalaý, «Bıznes Aımaq» óńirlik baǵdarlamasy aıasynda aýyl kásipkerlerine 300 shaǵyn nesıe berý qolǵa alynbaq.
Eske sala ketelik, budan buryn Atyraý oblysynda 10 iri ınvestıtsııalyq joba júzege asyrylatyn habarlaǵan bolatynbyz.
