Atyraýda alaıaq dırektor turǵyndardyń 300 mln teńgesin aldap alǵan
ATYRAÝ. QazAqparat –Atyraýda alaıaq dırektor turǵyndardyń 300 mln teńgesin aldap alǵan, dep habarlaıdy QazAqparat.
Oblystyq polıtsııa departamentiniń bastyǵy, polıtsııa polkovnıgi Qamza Úmbetqalıevtyń málimetinshe, taldaý kórsetkendeı alaıaqtyqpen baılanysty qylmystardyń sany artqan.
«Bıylǵy jyl basynan beri alaıaqtyq qylmysynyń tek asa iri mólsherde keltirilgen zalal túrine qatysty 10-ǵa jýyq deregi tirkeldi. Máselen, jeltoqsan aıynda polıtsııa departamentine turǵyndardan jaýapkershiligi shektelgen seriktiktiń biriniń dırektoryna qatysty 40-tan astam aryz tústi. Aryz berýshiler seriktestik dırektorynyń aı saıynǵy paıyzdyq mólsherlememen aqsha qarajatyn (aktıvterdi) aınalysqa salýdy usynǵan alaıaqtyq áreketi týraly shaǵymdandy. Jábirlenýshilerge 300 mıllıon teńgege jýyq materıaldyq zalal keltirilgeni anyqtaldy. Qazir atalǵan seriktestikke qatysty osy tektes aryzdardyń túsýi jalǵasyp jatyr», -deıdi departament bastyǵy Qamza Úmbetqalıev.
Eske sala ketelik, budan buryn atyraýlyqtardy aldaǵan «NuralıKapıtal» JShS dırektory Almatydan ustalǵanyn habarlaǵan edik.
