«Atyraýda aqyly kólik nómirlerine qyzyǵýshylyq artty» - baspasózge sholý
***
«Egemen Qazaqstan» gazetiniń jazýynsha, Qyzylorda oblysynda aımaqtyń ınvestıtsııalyq kelbetin arttyratyn, ishki jáne syrtqy týrızmdi damytýǵa atsalysatyn V «Baıqońyr» ınvestıtsııalyq forýmy ótti. Dástúrli forýmnyń týrızm salasyna qatysty bóligi Baıqońyr qalasynan bastaldy. Týrıstik salany damytýdyń ınvestıtsııalyq tartymdylyǵyn tarazylaǵan forým jumysyna oblys ákimi Qyrymbek Kósherbaev qatysyp, sheteldik jáne otandyq týroperatorlar men ınvestorlarǵa óńirdegi týrızmniń bolashaǵy týraly aıtty. Basqosýda Qyzylorda oblysynyń týrıstik áleýetin saralaǵan sheteldik jáne otandyq mamandar óz usynystaryn bildirdi.
«Qyzylorda oblysy týrızm salasynyń ınvestıtsııalyq tartymdylyǵy» taqyrybyndaǵy sektsııa jumysynda alty másele qaraldy. Shyǵyseýropalyq «FVW Median GmbN» qorynyń marketıng jónindegi dırektory Mıroslav Ronchak Qyzylorda oblysyna týrısterdi tartý úshin eń aldymen qyzmet kórsetý salasy halyqaralyq standarttarǵa saı bolýy kerek deıdi. Syr ólkesiniń tarıhı-mádenı eskertkishter men ortaǵasyrlyq eski qalalarǵa baı ekeni, buǵan qosa Aral teńiziniń de týrızm salasynda taptyrmas qural bolatyny da aıtyldy. «Eýropalyq, ásirese, germanııalyq týrısterdi Baıqońyr ǵarysh aılaǵy men Aral teńizi qyzyqtyrady. Tipti, olar Qazaqstan degen sózdi estise, eń áýeli Baıqońyrdy tilge tıek etedi», dedi Mıroslav Ronchak. Bul kólemdi maqala «Óńir ómirindegi ózgeris» degen taqyryppen basyldy.
Bas basylymda «Atyraýda aqyly kólik nómirlerine qyzyǵýshylyq artty» degen maqala berilgen. Atyraý oblysynda da qymbat kólikke úsh sany birdeı nemese eki nóli bar nómirlerdi taǵyp júrý sánge aınala bastady. Tipti, onyń baǵasy qymbat bolsa da, satyp alýdan tartynbaıtyndar qatary kóbeıip keledi. Ákimshilik polıtsııa basqarmasynyń bólim basshysy Arman Aıazǵalıevtyń aıtýynsha, byltyrǵy qazannan beri atyraýlyqtarǵa 119 kólik nómiri satylypty. Al bıylǵy jyl bastalysymen kólik ıeleri osyndaı 64 nómirdi satyp alýǵa qomaqty qarjy jumsaǵan. Jalpy, úlken suranys pen qyzyǵýshylyqqa ıe nómirlerdi satýdan bıýdjetke 21 mıllıon teńgeden astam qarjy túsken. Kólik ıeleriniń qyzyǵýshylyǵy 271 myń 554 teńgege baǵalanǵan - 111, 555, 888 jáne 451 myń 896 teńgelik - 001, 007 sandy nómirlerge aýyp otyr.
***
«Aıqyn» gazetiniń jazýynsha, «Nurly jol» baǵdarlamasy arqyly jumysqa turǵysy keletin jastardyń sany 3 590 adamǵa jetti.
Osy týrasynda Ortalyq kommýnıkatsııalar qyzmetinde ótken baspasóz máslıhatynda «Qazaqstan - 2050» jalpyulttyq qozǵalysynyń tóraǵasy Danat Jýmın: «Aǵymdaǵy jyldyń naýryz aıynda biz «Qazposhta» aktsıonerlik qoǵamymen birlesip «Nurly jol» baǵdarlamasy aıasynda turǵyzylatyn nysandarda jumys isteıtin jastar úshin respýblıkalyq arnaıy jobany qolǵa aldyq. Búginge deıin «Qazposhtanyń» aýyldyq bólimshelerinde osy baǵdarlama boıynsha jumysqa turǵysy keletin jastardan ótinish qabyldaý uıymdastyrylyp, barlyǵy 3 590 ótinish kelip tústi» dedi.
Onyń sózinshe, tap qazir ótinish ıelerimen telefon arqyly baılanys ornatylyp, Bilim jáne ǵylym mınıstrliginiń qoldaýymen Jasyl el jelisi boıynsha jumysqa turǵyzýdyń joldary túzilip jatyr. Sonymen qatar jastar «Jumyspen qamtýdyń jol kartasy» baǵdarlamasynyń da sharapatyn kóreıin dep otyr. Bul jaıynda «Nurly jol» arqyly jumysqa turmaq» degen maqaladan oqı alasyzdar.
Osy basylymda «Ardagerler Astanaǵa jol tartty» atty maqala kópshilik nazaryna usynylyp otyr. Jeńistiń 70 jyldyǵyna arnalǵan sherýge Aqtóbeden 15 ardager qatysatyn boldy. Soǵan oraı Tuńǵysh Prezıdent atyndaǵy ortalyq mádenıet jáne demalys saıabaǵynda áskerge shaqyrýshylar kúni uıymdastyrylyp, Otan aldyndaǵy boryshyn óteýge attanǵan 40 sarbazǵa ardagerler aqjol tiledi. Eki sharanyń ushtasýy, jastarǵa úlgi-ónege, úlkenge degen qurmet.
Ádette ásker qataryna alynyp, Otan aldyndaǵy boryshyn óteýge attanatyn jas jigitterdi ata-anasy men baýyrlary, qurdastary shyǵaryp salatyn edi. Bıyl oblys ákimi Arhımed Muhambetov pen Qorǵanys ister departamentiniń basshysy Ǵ.Jantýrın, UOS ardagerleari, tyl eńbekkerleri, áskerge shaqyrýshylardyń ata-analary, Aýǵan jáne lokaldi soǵystardyń ardagerleri, áskerı qyzmetshiler, kýrsanttar, joǵarǵy oqý ornynyń stýdentteri, mektep oqýshylary men patrıottyq klýbtardyń músheleri túgel qatysty.
***
«Ekspress-K» gazetiniń búgingi sanynda «Mysl, konechno, ınteresnaıa» degen maqala berilgen. ShQO polıtseıleri «Qaýipsizdik selfıi» atty baıqaýdy jarııalady. Olardyń usynysyna qaraǵanda, adamdar Jol júrý erejesin saqtaýdy eske salatyn bannerlerdiń aldynda sýretke túsýi tıis. «Bala - jaıaý júrginshi» aktsııasy aıasynda tártip saqshylary Óskemende joldaǵy saqtyq sharalaryna arnalǵan on bannerdi ornatqan eken. Taıaý arada taǵy da birneshe osyndaı bannerler qoıylmaq. Al bul bannerler tıimdi bolýy úshin ІІD qyzmetkerleri baıqaý aıasynda adamdardy barynsha kóbirek osy bannerlerdiń aldynda sýretke túsip, bul fotosýretterdi áleýmettik jelilerge ornalastyrǵannan keıin, olardyń siltemesin polıtsııanyń saıtyna jiberýge shaqyryp otyr.
