Atyraýda Aqushtap Baqtygereevanyń shyǵarmashylyq keshi ótti
«Aq samal jyry Jaıyqtyń» atty shara oblys ákimdiginiń qoldaýymen aqynnyń 75 jyldyq mereıtoıyna oraı uıymdastyryldy. Oǵan ádebıet maıtalmandary, qoǵam qaıratkerleri men Atyraý oblysynyń ákimi Nurlan Noǵaev qatysty.
Shyǵarmashylyq kesh aqynnyń óleńderine qoıylǵan sahnalyq kórinisten bastaldy. «Aýyz toltyryp aıtarlyqtaı atqarǵan isterińiz jeterlik. Qoǵamnyń qoǵam bolyp damýyna, qyzdardyń, bolashaq analardyń tárbıesine qosyp kele jatqan úlesińiz – sonyń dáleli. «Halqym, elim, Aqjaıyǵym» dep jurtyńyzǵa biraz dúnıe aıttyńyz. Áli de aıtaryńyz bar. Qazaq «kún - ortaq, aı - ortaq» dep aıtady. Sol sııaqty siz de búkil qazaqqa ortaqsyz. Mereıtoıyńyz qutty bolsyn!«, - dep quttyqtaý sózin jetkizdi N.Noǵaev.
Sonymen qatar, shyǵarmashylyq keshte aqynnyń sózine jazylǵan birqatar áýender oryndaldy.
A.Baqtygereevany quttyqtap kelgender qatarynda QR Halyq ártisi Roza Rymbaeva, sondaı-aq Sáýle Janpeıisova jáne Batys Qazaqstan oblysynyń Ǵ.Qurmanǵalıev atyndaǵy fılormonııa ártisteri boldy. BQO delegatsııasynyń atynan Mádenıet basqarmasynyń basshysy Qadyrbolat Musaǵalıev pen aqyn, Qazaqstan Jazýshylar odaǵynyń múshesi, T.Aıbergenov atyndaǵy syılyqtyń laýreaty, »Jaıyq Press« JShS bas dırektorynyń orynbasary Ǵaısaǵalı Seıtaq aqynǵa júrekjardy óleńderin oqydy. Keshte Sáýle Janpeıisova aqynǵa arnalyp jazylǵan «Aqushtap – aq shaǵala» ániniń tusaýyn kesti.
