Atyraýda ákimdik tapsyrysymen salynǵan kópqabatty úı qulaýy múmkin
Sybaılas jemqorlyqqa qarsy is-qımyl departamenti baspasóz qyzmetiniń málimetinshe, atalǵan turǵyn úıde 72 páter bar. Onyń 51-ine turǵyndar qonystanǵan.
«Atyraý qalalyq ákimdigi byltyrǵy shildede «Nurly jer» memlekettik baǵdarlamasymen 2017 jylǵy 13 jeltoqsandaǵy №370 memlekettik satyp alý shartymen jalpy somasy 788 101 880 teńgege baǵalanǵan 72 páterli toǵyz qabatty turǵyn úıdi qabyldap alǵan. Úıdiń qurylysyna Atyraý qalalyq ákimdiginiń qurylys bólimi tapsyrys bergen», - dedi departamentten.
Qurylys merdigeri – «Atyraý J.B.I.–2005» JShS. Oǵan tehnıkalyq qadaǵalaýdy «Injenerlik bıýro «NURTAU» JShS júrgizgen. Avtorlyq qadaǵalaýshy –«Atyraýbasjospar» JShS.
«Tapsyrys berýshi men tehnıkalyq qadaǵalaýshy irgetasty, rostverkterdi (ǵımarattardyń tirek qabyrǵalary astyndaǵy temirbeton jaqtaýlary), tsokoldyq jáne birinshi qabattaǵy baǵanalardy, sondaı-aq birinshi jáne jartylaı ekinshi qabattaǵy jaqtaýlardy salý kezinde temirbeton arqalyqtarynda (rıgelder) uzyndyǵy boıynsha shekti ruqsat etilgen mánnen asatyn ıilgen tustary baryn anyqtady. Osyǵan oraı «Atyraý J.B.I.–2005» JShS merdiger retinde tehnıkalyq tekserý júrgizý úshin «Tehekspert-Eko» seriktestigine tapsyrys bergen», - dep habarlady vedomstvonyń baspasóz qyzmetinen.
Sarapshynyń tehnıkalyq qorytyndysynda 72 páterli turǵyn úıdiń jaǵdaıy 3-sanatqa jatqyzylyp, qanaǵattanarlyq emes, jaramdylyq jaǵdaıy shekteýli degen sheshim alynǵan. Sebebi, turǵyn úıdegi zaqymdanýlardan keıin salmaq kóterý qabileti tómendegen. Úıdi odan ári paıdalaný úshin zaqymdanǵan qurylymdardy joıý qajet.
«Merdiger «Atyraý J.B.I. –2005» JShS bul eskertýdi elemegen. Atyraý qalalyq ákimdigi qurylys bóliminiń laýazymdy tulǵalary nysandy eskertýsiz qabyldaǵan. Merdigerge qurylysqa bólingen qarjy tolyq kólemde tólengen. Osyǵan baılanysty arnaıy monıtorıngilik top «Atyraý-adaldyq alańy» jobalyq keńsesimen birge shaǵynaýdanda boı kótergen atalǵan úıge monıtorıng júrgizdi. Tekserýde anyqtalǵan buzýshylyqtardy, turǵyn úıdi odan ári paıdalaný múmkindigin anyqtaý maqsatynda Atyraý oblysynyń memlekettik sáýlet-qurylys baqylaý jáne lıtsenzııalaý basqarmasyna, sondaı-aq qurylys salasyndaǵy mamandarǵa naqty zalaldy naqtylaý úshin suranys jiberildi», - dedi departamentten.
«Sot-qurylys saraptamasy jáne baǵalaý» JK mamanynyń qorytyndysyna sáıkes, turǵyn úı ǵımaratyna qurylymdardy nyǵaıtatyn jumystar júrgizilmese, odan ári paıdalanýǵa jaramsyz. Turǵyn úı ǵımaratyndaǵy temirbetondy belarqany nyǵaıtýǵa 29 472 411 mln teńge qajet.