Atyraýda ákimdik qyzmetkerleri memleket ıeligine qaıtarylǵan saıabaqty qoqystan tazartty
ASTANA. QazAqparat - Atyraýda qalany sanıtarlyq tazalaýdyń eki aılyǵy sheńberinde jalpyqalalyq senbilik bastaldy, dep habarlaıdy Atyraý oblystyq óńirlik kommýnıkatsııalar qyzmeti.
Búgin sáýirde «Qııal álemi» saıabaǵy aýmaǵyn tazartý jumysy bastaldy. Senbilikke qalalyq ákimdik pen kommýnaldyq mekemelerdiń qyzmetkerleri qatysty. Atyraý qalasy ákiminiń orynbasary Meıirim Qalaýıdiń aıtýynsha, saıabaq aýmaǵynyń jalpy aýdany 4 gektar, sanıtarlyq tazalaý eki kúnge jalǵasady.
«Saıabaq aýmaǵy tazalanǵannan keıin tal egemiz. Alǵa qaraı bul jerdi abattandyrý josparda bar. Balalarǵa arnalǵan attraktsıondar men sýburqaqtary bar jańa saıabaqtyń JSQ daıyndaýǵa konkýrs júrip jatyr. Atyraý qalasynyń kórikti jerleriniń biri bolady degen oıdamyz», deıdi Meıirim Qalaýı.
Aıta keterligi, «Qııal álemi» saıabaǵy 1 mamyrda ashylady. Saıabaqta kem degende tórt qaqpa bolady. Іshke Jeńis saıabaǵy arqyly da kirýge bolady. 
«Bul saıabaq on jyl boıy qaraýsyz qalyp keldi. Bıyl aýmaq memleket menshigine qaıtaryldy. Janyndaǵy «Rıvera» kesheni de memleket ıeligine qaıtaryldy, ony da abattandyryp, saıabaqqa aınaldyrý josparda bar», -deıdi qala ákiminiń orynbasary. 
Aıta keteıik, «Qııal álemi» saıabaǵy aýmaǵyn tazartý jumysy jeksenbi 22 sáýirde de jalǵasady. Senbilikke barlyq turǵyndar qatysa alady.
