Atyraýda ákimdik qyzmetkerleri kásipkerdiń jer telimin keńeıtýden bas tartqan
Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń baspasóz qyzmetinen málim etkendeı, kásipkerdiń jer ýchaskesin keńeıtýden bas tartqan Atyraý qalasy ákimdiginiń laýazymdy tulǵalary tártiptik jaýapkershilikke tartylǵan.
«Sheshim jer komıssııasynyń hattamasy negizinde ótinishti qaraý merzimderin buza otyryp, bas tartý týraly qaýly shyǵarmaı qabyldanǵan. Osyǵan baılanysty kásipker memlekettik organnyń sheshimine shaǵymdandy. Departament qyzmetkerleri kásipkerdiń dálelderin tekserip, kórsetilgen faktilerdi rastady. Qazir jergilikti atqarýshy organ jer telimin kásipkerge berý boıynsha máseleni qarastyryp jatyr. Kináli tulǵalar tártiptik jaýapkershilikke tartyldy», -dep habarlady departamenttiń baspasóz qyzmeti.
Sondaı-aq, Jylyoı aýdanynda kásipkerlerge jer ýchaskelerin bólý, bıznes nysandaryna ınfraqurylym jetkizý jónindegi máselelerge syrtqy taldaý júrgizilgen.
«Jylyoı aýdandyq jer komıssııasy 2020-2022 jyldary 27 kásipkerdiń aýyl sharýashylyǵy maqsatyndaǵy jer ýchaskesiniń nysanaly maqsatyn ózgertken. Zań talaptaryna sáıkes komıssııamen nysanaly maqsatyn ózgertý kózdelmegen. Máselen, Jylyoı aýdany ákimdiginiń qaýlysymen kásipkerge buryn paıdalanýda bolǵan jer ýchaskesine qosymsha 8,0 gektar zańsyz berilgen. Qosymsha berilgen jer ýchaskesi negizgi jer ýchaskesinen 500 ese artyq. Kásipkerge berilgen jer ýchaskesi birneshe bólikke bólingen. Bul zańǵa qaıshy, ári sybaılas jemqorlyq táýekelderiniń bar ekenin kórsetedi. Jylyoı aýdanyndaǵy jergilikti atqarýshy organdarynyń laýazymdy tulǵalary «Teńiz» vahta kentindegi jer ýchaskelerin aýktsıon arqyly saýda-sattyqqa qoımaı, kásipkerler úshin jasandy ákimshilik kedergiler jasaǵany anyqtaldy», -deıdi departament basshysynyń birinshi orynbasary Nurlan Jahın.
Eske sala ketelik, buǵan deıin Atyraýda monopolıst kásiporyn 99 kásipkerge 739 mln teńge qaryz bolǵanyn jazǵan edik.
