Atyraýda «Ákem, anam jáne men - sporttyq januıa» saıysy ótti
ATYRAÝ. QazAqparat - Atyraýda 1 maýsym - balalardy qorǵaý kúnine oraı memlekettik qyzmetker otbasylary arasynda «Ákem, anam jáne men - sporttyq januıa» saıysy ótti, dep habarlaıdy QazAqparat tilshisi.
Atyraý oblysy dene shynyqtyrý jáne sport basqarmasynyń baspasóz hatshysy Іlııas Shaıhıevtiń aıtýynsha, ár januıadan ákesi men anasy jáne eki balasy qatysty. Saıystar estafeta túrinde ótkizildi. Doppen kedergiler arqyly júgirý, sekirtpeler arqyly jarysý, qappen sekirý, dopty alyp júgirý jáne otbasylar túgel derlik «paravoz» jasap júgirý sekildi kezeńderde ózara synǵa tústi.
Jarystyń ashylý saltanatyna QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń basshysy - Ádep jónindegi keńes Tóraǵasy Toqtamys Jumaǵulov qatysyp, barsha qatysýshylarǵa sáttilik tiledi.
Jeti otbasy qatysqan saıysta Atyraý oblysynyń Tótenshe jaǵdaılar departamenti atynan synǵa túsken Orazǵalıevtar otbasy jeńiske jetti.
«Otbasymyzben birge sportpen turaqty túrde shuǵyldanyp turamyz. Búgin saıysqa balam men qyzymdy alyp keldim. Ekeýi de sportty jaqsy kóredi. Búgingi otbasylar saıysyna qatysyp qana qoımaı, jeńiske jetkenimizge qýanamyz», - deıdi «Jalyn» otbasynyń otaǵasy Ýalıhan Orazǵalıev.
Ekinshi oryndy Atyraý qalasynyń mamandandyrylǵan ákimshilik sotynyń atynan qatysqan Amanbaevtar otbasy jáne úshinshi oryndy Darıevtardyń otbasylary enshiledi.
Jarys jeńimpazdary men júldegerlerine dıplom men medaldar jáne arnaıy syılyqtar tabys etildi. Úzdik úsh komandaǵa velosıped syıǵa berildi.
