Atyraýda akademık Salyq Zımanovtyń esimi mektepke berilip, eskertkishi qoıyldy
Bıyl memleket jáne qoǵam qaıratkeri, akademık Salyq Zımanovtyń týǵanyna – 100 jyl. Osyǵan oraı búgin Atyraý qalasyndaǵy №37 orta mektepke Salyq Zımanovtyń esimi berilip, bilim ordasynyń aldynda qaıratkerdiń eńseli eskertkishi ornatyldy.
Saltanatty is-sharaǵa oblys ákiminiń orynbasary Narıman Taýshev, Parlament Senatynyń depýtaty Baqytjan Jumaǵulov, Parlament Májilisiniń depýtaty Názılá Razzak, qoǵam qaıratkeri Irak Elekeev, Atyraý oblystyq sotynyń tóraǵasy Baýyrjan Jumaǵulov, Ekologııa, geologııa jáne tabıǵı resýrstar mınıstriniń keńesshisi Sársenbaı Eńsegenov, Salyq Zımanovtyń kelini Janna Zımanova qatysty.
Zańǵar zańger Salyq Zımanovqa qoıylǵan eskertkishtiń avtory – músinshi Baqytbek Muhametjanov. Eskertkish qoladan quıylǵan. Jalpy bıiktigi – 4,1 metr, eskertkish bıiktigi – 2,50, tuǵyry – 1,60 metr.
Eske sala ketelik, budan buryn Atyraýdaǵy mektepke akademık Salyq Zımanovtyń esimi beriletinin jazǵan bolatynbyz.
