Atyraýda akademık Nádir Nádirovtiń esimi ınstıtýtqa berilip, eskertkish taqta qoıyldy

ATYRAÝ. QazAqparat – Atyraýda QR Ulttyq ǵylym akademııasynyń akademıgi, otandyq munaı-hımııa ǵylymı mektebiniń negizin qalaǵan akademık Nádir Nádirovtiń esimi ınstıtýtqa berilip, eskertkish taqta qoıyldy, dep habarlaıdy QazAqparat.

S.Ótebaev atyndaǵy Atyraý munaı jáne gaz ýnıversıtetinde «Ǵylymı dástúrler sabaqtastyǵynyń jáne mamandyqqa adaldyqtyń jarqyn úlgisi» taqyrybynda ótken is-sharaǵa oblys ákimi Mahambet Dosmuhambetov, Parlament Senatynyń depýtaty Baqytjan Jumaǵulov, Qazaqstannyń Eńbek Eri Uzaqbaı Qarabalın, ǵalymnyń otbasy men áriptesteri, sondaı-aq, Reseı Federatsııasynyń, Ázerbaıjan men Qyrǵyzstan Respýblıkasynyń ǵalymdary onlaın formatta qatysty.

Sondaı-aq, ýnıversıtet bazasynda ashylǵan hımııalyq ınjenerııa jáne ekologııa ınstıtýtyna Nádir Nádirovtiń esimi berilip, eskertkish taqta qoıyldy.

«Nádir Nádirov – kóp qıyndyq kórgen ǵalym. Kezinde Qyzylorda óńirine jer aýdarylyp kelip, óziniń «halyq jaýy» emes ekenin dáleldeý úshin myńdaǵan qujat jınap, oqýǵa tústi. Keıin áıgili ǵalym atandy. Akademık tek bir salamen shektelmeı, birneshe ǵylymmen aınalysty. Sondyqtan, búgingi jastar munaı hımııasyna ǵana baılanyp qalmaı, óz múmkindigin keńeıte bilýi kerek», -dedi Parlament Senatynyń depýtaty Baqytjan Jumaǵulov.

Eskertkish taqtanyń ashylý rásimine qatysqan Ekologııa, geologııa jáne tabıǵı resýrstar mınıstri Serikqalı Brekeshev, Qazaqstannyń Eńbek Eri Uzaqbaı Qarabalın men ǵalymnyń balalary sóz alyp, akademık týraly esteligimen bólisti.

Eske sala ketelik, budan buryn Atyraýda akademık Salyq Zımanovtyń esimi mektepke berilip, eskertkishi ashylǵany jazǵan bolatynbyz.