Atyraýda advokat, polıtseı men úsh zańger bopsalaý áreketi úshin sottaldy

Sottalýshylardyń barlyǵyna 3,5 jylǵa bas bostandyǵyn shekteý jazasy taǵaıyndaldy, dep habarlaıdy QazAqparat tilshisi.

«Zańgerler men polıtseıden bólek, iske qalanyń taǵy bir turǵyny aralasqan. Sottalýshylar bopsalaý, laýazymdyq ókilettigin teris paıdalaný, kórineý jalǵan málimet jetkizý, sondaı-aq abaısyzdan densaýlyqqa zııan keltirgeni úshin aıyptaldy. Olardy UQK departamentiniń qyzmetkerleri ustady. Atalǵan tulǵalarǵa qylmystyq top quryp, iri qala bazarlaryna barǵan degen aıyp taǵyldy. Olar kóshi-qon zańnamasynyń, sondaı-aq sanıtarlyq-epıdemıologııalyq normalardyń buzylǵanyn anyqtaǵan. Tártip buzýshylardy anyqtap, olardan aqsha bopsalaı bastaǵan. Atalǵan tulǵalarǵa ýchaskelik ınspektor kómektesken. Saýda núktelerimen shektelmeı, bopsalaýshylar zańsyz júk tasymalymen aınalysqan »Almaty - Atyraý« jolaýshylar quramynyń jolserikterinen de alym-salyq jınap otyrǵan», - dedi oblystyq sottyń baspasóz hatshysy Boranbaı Ǵalıev.

Onyń aıtýynsha, tergeý barysynda ustalǵandardyń barlyǵy óz kinásin moıyndap, jábirlenýshilerge keltirgen shyǵynnyń ornyn toltyrǵanyn habarlady. Protsessýaldyq kelisim jasaldy. Degenmen, sot barlyq sottalýshylardy kináli dep tanyp, árqaısysyna 3,5 jyl merzimge bas bostandyǵyn shekteý túrindegi jaza taǵaıyndady.