Atyraýda adamdardy qaýipten qutqarǵan 9 polıtseı marapattaldy
ATYRAÝ. QazAqparat – Іshki ister mınıstri Erlan Turǵymbaevtyń buıryǵymen adamdardy qaýipten qutqarǵan atyraýlyq 9 polıtsııa qyzmetkeri «Quqyq tártibin qamtamasyz etýge qosqan úlesi úshin» medalimen marapattaldy, dep habarlaıdy QazAqparat.
Oblystyq Polıtsııa departamenti baspasóz qyzmetiniń aqparatyna súıensek, bıyl atyraýlyq polıtseıler óz ómirine qaýip tóngenine qaramastan, adamdardy qutqarýda batyldyq pen janqııarlyq kórsetken.
Máselen, Atyraý qalasyndaǵy Balyqshy shaǵyn aýdanynda 15 jastaǵy eki jasóspirim keshki saǵat 20:00 shamasynda Jaıyq ózeniniń muzyna túsip ketken. Olardyń kómekke shaqyrǵan daýsyn estigen tpolıtsııa kapıtany Asqar Qabdollaev jedel qutqarýǵa kirisken. Eki jasóspirimdi ázer sýdan alyp shyqqan polıtseı olardy úıine aparyp, jedel-járdem qyzmetkerlerin shaqyrtqan. Qutqarylǵan Vladımır jáne Danıldiń biri – kolledj stýdenti, ekinshisi – 8-synyp oqýshysy.
Jedel járdem dárigerlerdiń aıtýynsha, sol sátte jasóspirimder salqyn sýǵa túskendikten denesi tońyp qalǵan. Olarǵa tıisti em-dom jasaldy. Qutqarylǵan Vladımırdiń aǵasy Aleksandr Krıshnevskıı polıtsııa kapıtany Asqar Qabdollaevqa rızashylyǵyn bildirip, onyń bul áreketin úlken erlikke balady.
Al, 16 naýryzda saǵat 01:00 shamasynda Qurmanǵazy aýdanynyń Maqash aýyldyq okrýgine qarasty Alǵa aýylyndaǵy turǵyn úıdiń birinde órt tutanǵan. Jalyndy der kezinde baıqaǵan ýchaskelik polıtsııa ınspektorlary Talǵan Rahımov pen Birjan Mahmýdov, polıtsııa aǵa serjanty Baqytjan Qadyrbev janyp jatqan úıden 4 eresek adam men 3 balany syrtqa alyp shyqty. Órt sóndirýshiler kelgenge deıin ózderiniń kásibı sheberligin tanytyp, órttiń betin qaıtardy.
Sondaı-aq, 11 sáýirde saǵat 04:10 shamasynda Qulsary qalasynda kópqabatty úıdegi páterdiń biri órtengen. Oqıǵa ornyna quramynda polıtsııa aǵa leıtenanty A.Shahaev, polıtsııa kishi leıtenanty A.Toıǵulov, polıtsııa kapıtany J.Tólepov, polıtsııa aǵa leıtenanty A.Marat bar «Qaısar» túngi tosqaýyl qyzmetkerleri jedel jetken. Elektr energııasynan aqaý shyǵyp, birinshi qabattaǵy páterdiń ishin qoıý tútin basqan. Polıtsııa qyzmetkerleri jedel áreket etip, órt sharpyǵan, sondaı-aq, kórshiles páterlerden 14 adamdy, onyń ishinde 10 jasósipirimdi dalǵa alyp shyǵyp, qutqaryp qalǵan.
Atyraý qalalyq polıtsııa basqarmasynyń kámeletke tolmaǵandar isteri jónindegi ýchaskelik polıtsııa ınspektory, polıtsııa aǵa leıtenanty A.Qaıyrǵalıev 14 sáýirde saǵat 01:30 shamasynda kópqabatty úıdegi páterden jasóspirim qyzdy qutqarǵan. Polıtseıge 4-qabattyń balkonynan 3-qabatqa túsýge keldi. Óıtkeni, ishinde jasóspirim qyz jalǵyz qalǵan páter kilttenip qalǵan. Sóıtip, kiltteýli páter ishine kirip, oqys oqıǵanyń aldyn aldy.
«Qıyn sátte adamdardy qutqarýda kórsetken batyrlyq ben erlik kórsettińizder. Bul – sizderdiń taraptaryńyzdan antqa beriktiktiń, atqaratyn qyzmetke adaldyqtyń shynaıy kórinisi» dedi departament bastyǵy polıtsııa, polkovnıgi Qamza Úmbetqalıev.
