Atyraýda adam urlaǵandar Túrkistanda jasyrynyp júrgen
ShYMKENT. QazAqparat - Atyraýda adam urlaǵan eki kúdikti Túrkistan qalasynda jasyrynyp júrgen jerinen ustaldy, dep habarlaıdy QazAqparat tilshisi.
«Adam urlaý deregi osy jyldyń 4 qańtar kúni oryn alǵan bolatyn. Eki er adam Datov kóshesinde 1990 jyly týǵan azamatty erkinen tys reseılik nómirli VAZ-2114 kóligine otyrǵyzyp, urlap ketken. Qalanyń syrtyna shyǵaryp, eki saǵat boıyna armatýramen urǵan. 600 myń teńge talap etken. Aıtqandaryn oryndata almaǵan soń, oqıǵa ornynan boı tasalap ketipti. Al, aýyr dene jaraqatyn alǵan jábirlenýshi polıtsııaǵa aryzdanǵan. Tergeý sharalary kezinde adam urlaǵandardyń tulǵasy anyqtalyp, olardyń buryn sotty bolǵan 1987 jáne 1990 jyly týǵan Atyraý turǵyndary ekeni belgili boldy» deıdi Atyraý oblystyq ІІD baspasóz qyzmetiniń baspasóz hatshysy Nazymgúl Qaısaǵalıeva.
Jedel izdestirý sharalaryn júrgizý kezinde seziktilerdiń Atyraý qalasynan qashyp ketip, Ońtústik Qazaqstan oblysy aýmaǵynda júrgeni anyqtaldy. Tártip saqshylary adam urlaǵan ekeýdi Túrkistan qalasynda qolǵa túsirdi. Tergeý barysynda kúdiktiler Qyrǵyzstanǵa shekara aspaq bolǵanyn aıtqan.
«Adam urlaýshy seziktilerdiń jospary júzege aspaı qaldy. Olardy ustaý úshin sot tájirıbesinde alǵash ret bas sharasyn qamaýǵa alý týraly sanktsııa beınekonferentsııa arqyly júzege asyryldy»,- dedi Nazymgúl Qaısaǵalıeva.
Ekeýine qatysty Qylmystyq kodekstiń 125 baby «Adam urlaý» boıynsha is qozǵalyp, tergeý amaldary júrgizilýde. Kúdiktiler Atyraý qalasyna qaraýyl jasaǵynyń arqyly jetkiziletin bolady.
