Atyraýda adam ólimine ákep soqqan jol apatyn jasaǵan júrgizýshi sottaldy
ATYRAÝ. QazAqparat - Atyraýda adam ólimine ákep soqqan jol apatyn jasaǵan azamat 5 jylǵa sottaldy, dep habarlaıdy QazAqparat.
Atyraý oblysynyń Qurmanǵazy aýdandyq sotynda Qazaqstan Respýblıkasynyń QK-niń 345-babynyń 4-bóligimen sottalǵan T.-ǵa qatysty qylmystyq is qaraldy.
«Basty sot talqylaýynda anyqtalǵandaı, T. 2018 jyldyń maýsym aıynda «Lada-Largýs» markaly avtokóligin Atyraý-Astrahan tas jolynda basqaryp kele jatyp, «Toıota-Ipsým» markaly avtokóligimen soqtyǵysqan. Alynǵan jaraqattar saldarynan eki jolaýshy oqıǵa ornynda qaza bolyp, qalǵan jolaýshylar ártúrli aýyrlyqtaǵy jaraqattar alǵan. Sotta T. óz kinásin tolyq moıyndady», - dep habarlady Atyraý oblysy Qurmanǵazy aýdandyq sotynyń baspasóz qyzmetinen.
Aıta ketelik, sot T.-ny kináli dep tanyp, 5 jylǵa bas bostandyǵynan aıyrý jazasyn taǵaıyndap, qosymsha jaza retinde 6 jylǵa kólik quralyn basqarý quqyǵynan aıyrdy.
