Atyraýda Ábý Sársenbaevqa eskertkish ornatyldy
ATYRAÝ. QazAqparat - Búgin Atyraý qalasyndaǵy Almagúl yqshamaýdanynda Qazaqstannyń halyq jazýshysy Ábý Sársenbaevqa arnalǵan eskertkishtiń ashylý saltanaty ótti, dep habarlaıdy QazAqparat.
Atyraý oblysynyń ákimi Nurlan Noǵaev eskertkish oblys ortalyǵyndaǵy kórnekti jerlerdiń qataryn tolyqtyratynyn atap ótti.
«Memleket basshysynyń «Rýhanı jańǵyrý» baǵdarlamalyq maqalasyn iske asyrý aıasynda aımaqta ulttyq qundylyqtardy dáripteýge, Kaspıı óńirindegi tarıhı tulǵalardy ulyqtaýǵa baǵyttalǵan sharalar atqarylyp jatyr. Búgingi shara halqyn súıgen, týǵan jerin qasterlegen aqynǵa, jazýshyǵa degen qurmet. Onyń shyǵarmalaryndaǵy keıipkerler eldiń, qazaq halqynyń taǵdyrymen tikeleı baılanysty qarapaıym adamdar boldy. Ábý Sársenbaevpen tanys bolý baqyty buıyrǵan adamdarǵa, shyǵarmashylyq murasyn búginge deıin jetkizgen týystary men jaqyndaryna alǵys aıtamyz», - dedi Nurlan Noǵaev.
Ashylý saltanatynda sóz alǵandar Ábý Sársenbaevtyń keıipkerleri qarapaıym adamdar bolǵanyn atap ótti. Onyń shyǵarmalarynda balyqshylar ómiri týraly kóp aıtylady.
Eskertkishte jazýshynyń tutas tulǵasy músindelgen, bıiktigi - 3,5 metr. Avtory -QR Sýretshiler Odaǵynyń múshesi, mádenıet qaıratkeri Aıdarhan Qalmahanov.
