Atyraýda abaısyzda adam óltirgen áskerı 8 jylǵa bas bostandyǵynan aıyryldy
ShYMKENT. QazAqparat - Shymkent garnızonynyń áskerı soty abaısyzda adam óltirgen áskerıdi 8 jylǵa bas bostandyǵynan aıyrdy. Sottalýshy aýyr qylmysty kezekti eńbek demalysynda júrip jasaǵan, dep habarlaıdy QazAqparat HAA tilshisi.
Áskerı sottyń baspasóz qyzmeti bergen málimetke sáıkes, keleńsiz jaǵdaı Atyraý oblysynda bolǵan. Arman esimdi áskerı qyzmetker eńbek demalysy kezinde dostarymen ishimdik ishedi. Sol jerde 39 jastaǵy Nurmahan esimdi tanysymen sózge kelip, sońy tóbeleske ulasqan. Burynnan sportpen shuǵyldanatyn áskerı jigit aýyldasyn eki ret soqqan. Saldarynan taıaq jegen jigit esinen tanyp qulaıdy. Sońynan onyń kóz jumǵany anyqtalady.
Kisi óltirgen jigittiń áskerı qyzmetker bolýyna baılanysty bul is Shymkent garnızonynyń áskerı sotynda qaraldy. Tergeý qujattarymen tanysyp shyqqan sýdıa 27 jastaǵy aıyptalýshyny kináli dep taýyp, ony 8 jylǵa bas bostandyǵynan aıyrý týraly úkim shyǵardy. Sottalýshy jazasyn jalpy tártiptegi túrmede óteıtin boldy.
Sot úkimi kúshine endi.
