Atyraýda Abaıdyń 175 jyldyq mereıtoıyna oraı bokstan jarys ótti

ATYRAÝ. QazAqparat - Atyraýda sheteldik jáne qazaqstandyq boksshylardyń qatysýymen uly oıshyl Abaıdyń 175 jyldyq mereıtoıyna arnalǵan jarys ótti, dep habarlaıdy Atyraý oblystyq kommýnıkatsııalar qyzmeti.

Sport sharasy Atyraý oblysy ákimdiginiń qoldaýymen jáne «SULEIMEN Promotions» proýmoýterlik kompanııasynyń uıymdastyrýymen ótti.

5 jekpe-jekten turatyn kásipqoı boks keshi sanıtarlyq normalarǵa saı kórermensiz ótip, jurtshylyqqa «HABAR» telearnasy arqyly tikeleı efırde kórsetildi.

Dodada qazaqstandyq 22 jasar Bekzat Nurdáýletovtiń qarsylasy tanzanııalyq 28 jastaǵy Ibrahım Maokala boldy. Alty raýndqa josparlanǵan jekpe-jek ekinshi raýndta nokaýtpen aıaqtaldy. Osylaısha qazaqstandyq boksshy Bekzat Nurdáýletov kásipqoı bokstaǵy debıýtin sátti bastady.

Al Danıla Semenov tanzanııalyq qarsylasy Mýssa Adjıbýdy tórtinshi raýndta tehnıkalyq nokaýtqa jiberdi. Bul aýyr salmaqtaǵy jekpe-jek alty raýndqa josparlanǵan.

Keshtiń úshinshi jekpe-jegi qazaqstandyq Evgenıı Pavlov pen Tanzanııadan kelgen tájirıbeli Gýdlak Mremanyń arasynda ótti. Ekinshi jeńil salmaqtaǵy bul jekpe-jek ekinshi raýndta aıaqtaldy. Evgenıı Pavlov qarsylasyn nokaýtqa túsirip, jeńiske jetti.

Abylaıhan Júsipov kásipqoı bokstaǵy alǵashqy jekpe-jegin tanzanııalyq Meshak Mvankemvamen ótkizdi. Birinshi orta salmaqtaǵy aıqas alty raýndqa sozylyp, tóreshiler sheshimimen jekpe-jek Júsipovtiń jeńisimen aıaqtaldy.

Basty aıqas qazaqstandyq boksshy Bek Nurmaǵanbet pen tanzanııalyq Abdalah Pazımen arasynda uıymdastyryldy. Jartylaı aýyr salmaqtaǵy jekpe-jek alty raýndqa sozylyp, sheshim boıynsha Nurmaǵanbettiń jeńisimen aıaqtaldy.

Aıta keteıik, atalǵan sporttyq dodada qazaqstandyq úsh birdeı sportshy kásipqoı bokstaǵy alǵashqy jekpe-jegin ótkizdi. Olar - Danıla Semenov, Abylaıhan Júsipov, Bekzat Nurdáýletov.