Atyraýda Abaıdyń 175 jyldyǵyna oraı respýblıkalyq aıtys ótip jatyr
ATYRAÝ. QazAqparat – Atyraýda Abaıdyń 175 jyldyǵyna oraı «Qalyń elim, qazaǵym!» atty respýblıkalyq aqyndar aıtysy bastaldy. Aıtys Mahambet atyndaǵy akademııalyq qazaq drama teatrynda ótip jatyr, dep habarlaıdy QazAqparat.
Aqyndar aıtysy búgin bastaldy. Aıtysty oblys ákimdiginiń qoldaýymen Qazaqstan Jazýshylar Odaǵynyń óńirlik fılıaly uıymdastyryp otyr. Fılıal dırektory Qoıshyǵul Jylqyshıevtyń aıtýynsha, kesteli jyrdan sóz óriletin jyr dodasyna ár óńirden kelgen 24 aqyn baq synaýda.
Respýblıkalyq aıtystyń ashylý saltanatynda oblys ákiminiń orynbasary Baqytgúl Hamenova aqyndarǵa sáttilik tiledi.
Belgili aqyn Júrsin Erman aıtysty júrgizip otyr. Al, aqyndar ónerine baǵa beretin qazylar alqasynyń tóraǵasy – KSRO jáne Qazaqstan Respýblıkasy Memlekettik syılyqtarynyń laýreaty, Qazaqstannyń Eńbek Eri, teatr jáne kıno akteri Asanáli Áshimov.
Aıtystyń jeńimpazy men júldegerleri erteń anyqtalady.
Eske sala ketelik, budan buryn Atyraýda «Saraıshyq» jýrnaly jaryqqa shyqqanyn habarlaǵan edik.
