Atyraýda A/H1N1 tumaýy aýrý anyqtalǵannan keıin shetelge shyǵatyndarǵa sanıtarlyq baqylaý kúsheıtildi
ATYRAÝ. Qarashanyń 25-i. QazAqparat /Andreı Sokolov/ - Ótken seısenbide A/H1N1 tumaýy oqıǵasy tirkelgen Atyraý oblysynda shetelde bolǵan azamattarǵa sanıtarlyq baqylaý kúsheıtildi.
Oblystyq memlekettik sanıtarlyq-epıdemıologııalyq baqylaý basqarmasynyń bastyǵy Ómirzaq Zınýllınniń habarlaýynsha, Atyraý qalasynyń halyqaralyq áýejaıynda táýlik boıy sanıtarlyq-karantındik pýnkt jumys jasaıdy. Shetelden kelgen barlyq adamdar arnaıy baqylaýdan ótedi. Bul baqylaý teplovızor kómegimen júrgiziledi. Mundaı baqylaýdan keıin de, oblysymyzǵa kelgen barlyq sheteldikter, shetelde bolǵan Qazaqstan azamattary 7 kún boıy qadaǵalaýda bolady. Eger qandaı da bir vırýstyq ınfektsııa belgileri baıqalsa, olar dereý aýrýhanaǵa jatqyzylady.
Ó.Zınýllınniń aıtýynsha, shetelderden keletin azamattardyń basym bóligi úlesine tıetin «Teńizshevroıl» JShS-ynda (TShO), «Adjıp KKO» kompanııasynda qaýipsizdiktiń kúsheıtilgen sharalary qolǵa alyndy. TShO-nyń Teńiz kenishindegi «Shańyraq» vahtalyq kentinde tumaý vırýsyna qarsy 10 myń ampýla Tamıflıý preparattary qory jasaqtalǵan.
