Atyraýda 900 oqýshyǵa arnalǵan ózgeshe mekteptiń qurylysy bastaldy
Oblys ákiminiń baspasóz qyzmetinen málim etkendeı, jańa bilim ordasy Atyraý qalasyndaǵy Talqaıran shaǵyn aýdanynda boı kóteredi. Mektep 2024 jyly paıdalanýǵa beriledi.
«Memleket basshysy Qasym-Jomart Toqaev óziniń Qazaqstan halqyna Joldaýynda «Orta bilimniń sapasy – tabysty ult bolýdyń taǵy bir mańyzdy sharty. Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis. Jalpy, mektep salý Úkimet jáne ákimdikter úshin basty mindettiń biri bolýy kerek» degen edi. Biz osy mindeti júzege asyrý úshin taǵy bir jańa bilim oshaǵynyń irgetasyn qaladyq. Basty mindetimiz – qurylys jumystarynyń merziminde sapaly atqarylýyna qol jetkizý. El bolashaǵy bilimdi urpaq qolynda degen qaǵıdaǵa súıensek, bul is – sol jolǵa jumsalǵan ınvestıtsııa», -dedi Serik Shápkenov.
Jańa mekteptiń qurylysy salý úshin 3 gektar jer telimi bólingen. Mektep úsh bloktan turady. Birinshi blokta 1-4 synyp, ekinshi blokta 5-9 synyp, úshinshi blokta 10-11 synyp oqýshylary bilim alatyny josparlanǵan.
Bilim ordasynda 210 oryndyq akt zaly, 312 oryndyq ashana, eki sportzal men eki kitaphana, medıtsınalyq beket bolady. 25 oqýshyǵa arnalǵan 36 oqý kabıneti zamanaýı úlgide jasaqtalady.
Mekteptiń syrtqy aýmaǵy abattandyrylyp, fýtbol alańy, júgirý joly, sporttyq trenajer, tennıs korty men voleıbol alańy bar stadıon salý josparlanǵan. Sondaı-aq, alǵashqy áskerı daıyndyq sabaǵyna arnalǵan keńistik jasalady. Mektep avtobýsy men jeke, sonyń ishinde múmkindigi shekteýli adamdardyń kólikteri úshin avtoturaq ashylady.
Eske sala ketelik, budan buryn majar ınvestory Atyraýda kúnnen energııa alý jobasyn usynǵanyn habarlaǵan edik.