Atyraýda 9-qabattyń balkonynda jalǵyz júrgen eki jasar bala qutqaryldy

ATYRAÝ. QazAqparat – Atyraý polıtseıleri 9-qabattaǵy balkonda jalǵyz júrgen 2 jasar balany qutqardy, dep habarlaıdy QazAqparat.

Oblystyq polıtsııa departamentiniń málimetinshe, búgin, 4 maýsymda saǵat 17:00 shamasynda patrýldik polıtsııa ekıpajyna jedel habar berilgen.

Onda kishkentaı balanyń 9-qabattaǵy balkonnan qulaý qaýpi týyndaǵany aıtylǵan.

«Patrýldik polıtsııa qyzmetiniń ınspektorlary Elaman Tóleshov pen Nurbol Baǵytov Atyraý qalasynyń «Bereke» shaǵyn aýdanynda ornalasqan kópqabatty turǵyn úıdiń 9-qabatyndaǵy balkonda 2 jasar balanyń jalǵyz júrgenin anyqtady. Osyǵan baılanysty ınspektorlar qutqarý áreketine jedel kiristi. Olar 9-qabatqa evakýatsııalaýǵa arnalǵan baspaldaq arqyly kóterilip, balkondaǵy balany qulaý qaýpinen qutqaryp qaldy», -dep habarlady departamenttiń baspasóz qyzmeti.

Kópqabatty úı turǵyndarynyń aıtýynsha, 2 jasar bala balkonnan turmystyq zattardy jerge laqtyrǵan. Bul kezde kishkentaı balaqaı úıinde jalǵyz bolǵan.

Atyraý qalalyq polıtsııa basqarmasynyń ıývenaldy polıtsııa qyzmetiniń ınspektorlary balanyń anasyn anyqtady. Balasyn úıinde jalǵyz qaldyrǵan ana – 37 jastaǵy áıel.

Eske sala ketelik, buǵan deıin Atyraýda tún ortasynda balkonda turǵan 4 jasar bala qutqarylǵanyn jazǵan edik.