Atyraýda 82 jastaǵy aqsaqal koronavırýstan jazylyp ketti
ATYRAÝ. QazAqparat - Qazirgi tańda koronavırýstan aıyqqan aqsaqal oblystyq kardıologııalyq dıspanserge ornalastyryldy, dep habarlaıdy Atyraý oblysynda tótenshe jaǵdaı jónindegi shuǵyl shtab.
Atyraý oblysy densaýlyq saqtaý basqarmasy basshysynyń mindetin atqarýshy Gúlnafıs Tańbaevanyń aıtýynsha, 82 jastaǵy emdelýshi oblystyq kardıologııalyq dıspanserine jatqyzyldy.
«Eki jaqty pnevmonııa, ıaǵnı, ókpeniń qabynýyn týdyrǵan koronavırýs ınfektsııasy naýqastyń júrek qan tamyrlaryndaǵy ıshemııalyq aýrýyn qozdyryp jiberdi. Qazirgi tańda naýqas kardıostımýlıator apparatyna qosýly», - deıdi Gúlnafıs Tańbaeva.
Búgingi tańda naýqas tıisti em qabyldap jatyr. Arıtmologtar men kardıologtardyń baqylaýynda.
Eske sala keteıik, búginde Qazaqstanda 568 adam koronavırýstan jazylssa, onyń ishinde 31 naýqas - Atyraý oblysynda.
