Atyraýda 800 oqýshy olımpıadada baq synady
ASTANA. QazAqparat - Atyraýda jaratylystaný-matematıka baǵyty boıynsha 20-shy respýblıkalyq olımpıada ótti. Oǵan 800 oqýshy qatysyp, baqtaryn synady, dep habarlaıdy QazAqparat.
Olımpıada Atyraý qalasynda 15 naýryz kúni bastaldy. Onyń qorytyndysy boıynsha 67 oqýshy altyn, 104 oqýshy kúmis jáne 177 oqýshy qola medaldarmen marapattaldy.
Jalpy saıys qorytyndysy boıynsha, «Eń úzdik olımpıada komandasy-2018» nomınatsııasy boıynsha 1-oryn Atyraý, Pavlodar oblystary, Astana qalasy men Nazarbaev zııatkerlik mektepteriniń komandalaryna, 2-oryn Aqtóbe, Almaty, Qaraǵandy, Mańǵystaý oblystarynyń komandalaryna, 3-oryn Qyzylorda, Batys Qazaqstan oblystarynyń komandalaryna buıyrdy. Sonymen qatar, «Olımpıadanyń eń jas qatysýshysy», «Eń úzdik aýyl oqýshysy», «Eń úzdik aýyl muǵalimi» jáne «Eń úzdik olımpıadalyq mektep» nomınatsııalary boıynsha jeńimpazdar anyqtaldy.
Olımpıadanyń jabylý saltanatyna oblys ákimi Nurlan Noǵaev qatysyp, júldeli oryndardy tabystady.
«Elbasymyz jastarǵa úlken senim artady, álemdegi jahandaný protsesinde bolyp jatqan keleńsiz jaǵdaılarǵa tótep beretindeı bilimdi, tárbıeli, ishki rýhy bıik azamattardy tárbıeleý jóninde is-sharalardy júzege asyrýdy ortalyq memlekettik jáne jergilikti atqarýshy bılik ókilderine tapsyryp otyrady. Elimizdi alǵa qaraı damytatyn sizder, osy baǵyttan taımańyzdar. Joldaryńyz aq bolyp, ózderińiz qoıǵan mejege jetýlerińizge, sizderge senim artqan azamattardyń úmitteriniń aqtalýyna tilektespin», - dedi oblys basshysy.
Aıta keteıik, olımpıadaǵa elimizdiń 14 oblysynan, Astana, Almaty qalalarynan, respýblıkalyq bilim berý uıymdarynan jáne Nazarbaev zııatkerlik mektebinen 19 komanda qatysty. Atyraý oblysy boıynsha 53 oqýshy qatysyp, 21 júldeli oryn jeńip aldy.
Olımpıadadan tys ýaqytta oqýshylar qaladaǵy bilim ordalarymen, mádenı-tarıhı oryndarmen tanysyp, psıhologııalyq trenıngter men sporttyq sharalarǵa qatysty.
